Hefe di mision di ONU na Colombia, Jean Arnault, a bisa cu tabata imposibel pa cumpli dentro di e tempo acorda, cu e prome obhetivo cu ta estableci den e proceso di ‘alto al fuego’, despues di e acuerdo di paz entre gobierno di Colombia y FARC. Asina tambe a informa cu e segundo obhetivo no lo a ser cumpli tampoco den e tempo estima.
Jean Arnault a bisa na Conseho di Seguridad di Nacion Uni cu no a logra dentro di e tempo cu a vence 1 di januari, pa motibo di hopi dificultad di logistica. Den e tempo aki guerrilleronan mester a bay reuni den mas di 20 area di desmobilisacion y e situacion aki no a sucede ainda. Arnault a bisa cu “no lo ta posibel pa cumpli cu e segundo tempo cu ta vence riba dia 30 di januari, unda mester destrui tur municion instabil cu ta tira alrededor di e pais.” Di igual manera gobierno y guerrilla a bisa cu nan kier haci tur lo posibel pa logra e meta original di laga tur arma pa inicio di luna di juni.” María Mejía, embahador di Colombia na ONU a bisa cu areanan unda e campamento di guerrilleronan ta funciona tin dificil acceso, no tin ningun caminda pa comunicacion, no tin awa potabel, no tin electricidad y pa tal motibo e proceso a bira hopi dificil.
Arnault a bisa cu siman cu a pasa el a bishita hunto cu presidente Juan Manuel Santos e zona sur di Colombia, y na e momento ey Presidente di Colombia a ordena pa laga tur obstaculo un banda y logra cu tur campamentonan por ta cla den poco tempo.
