Un Conseho di Siguridad di ONU dividi no a logra un acuerdo tocante e ofensiva di Turkia na nort oriente di Siria ayera, cu e Europeonan exigiendo un stop na accion militar, y aliado di Siria, Rusia exigiendo ‘moderacion’ y ‘dialogo directo’ entre e dos pais.
E cinco miembronan Europeo di e conseho, kende a yama e reunion cera, lo tabata kier pa tur 15 miembro bay di acuerdo cu un declaracion tocante e accion Turco, lansa despues cu presidente Donald Trump diripiente a retira forsanan Mericano for di e nort oriente volatil.
Merca a propone un declaracion expresando ‘preocupacion profundo’, a pidi proteccion pa civilnan, y a pidi Turkia pasa den canalnan diplomatico na luga di tuma accion militar, segun diplomaticonan di e conseho a bisa bou condicion anonimo.
Pero embahador di Rusia na ONU, Vassily Nebenzia a bisa reporteronan despues cu cualkier declaracion di Conseho di Siguridad mester tene den consideracion otro aspectonan di e crisis na Siria, no unicamente e operacion Turco, y lo mester exigi e terminacion inmediato di e ‘presencia militar ilegal’ den e pais.
E Europeonan e ora ey a duna nan propio declaracion despues di e reunion, urgiendo Turkia pa ‘stop accion militar unilateral’. Nan a bisa cu e accion ta menasa progreso di e coalicion global contra e grupo extremista Estado Islamico, boicotia stabilidad den e region y aumenta ‘sufrimento civil’.
Turkia ta bisa cu ta atacando militantenan Kurdo, kende a bringa banda di forsanan Mericano pa saca e grupo extremista Estado Islamico for di nort Siria. Presidente Recep Tayyip Erdogan su gobierno ta considera e Kurdonan como ‘terorista’ aliado na e Partido di Trahado di Kurdistan, ilegal na Turkia.
