(AP) – OnlyFans a tuma e decision di suspende e plan di prohibi contenido explicitamente sexual despues di un cantidad grandi di critica di su creadornan y e hendenan cu ta boga pa trahadonan sexual.
E sitio web cu ta traha riba subscripcion a bisa den un declaracion riba diaranson cu e plan di prohibicion “ya no ta necesario mas pa motibo cu e socionan bankario a sigura cu OnlyFans lo por sostene creadornan di tur tipo di genero” y a nenga di contesta mas pregunta.
OnlyFans a bisa siman pasa diahuebs cu e lo prohibi contenido explicitamente sexual cuminsando for di 1 di october, citando polisa di banco y procesadornan di pago pa e cambio di polisa. “E reglanan nobo ta necesario pa por cumpli cu e rekisitonan di e institutonan financiero y ta e unico manera cu nos por sigura cu OnlyFans lo por ser sosteni pa un tempo largo,” e compania a bisa den un mensahe pa su usuarionan siman pasa.
Siman pasa su cambio repentino a disgusta hopi di e creadornan cu ta haci uso di e sitio web, kendenan a menasa di move na otro plataforma. Hopi di e trahadonan sexual a traha cuenta cu OnlyFans durante e pandemia ora cu ciere a causa cu hopi di e establecimentonan unda cu nan lo por duna nan servicio a cera, of a bira hopi mas peligroso. E sitio web a bira un plataforma cu por genera hopi ganashi, dunando cierto usuarionan e oportunidad di por gana miles cada luna. OnlyFans ta bisa cu e tin 130 miyon usuario y 2 miyon creador kendenan colectivamente a gana mas o menos 5 biyon dollar.
Tin otro sitionan unda cu hende por paga pa contenido pornografico, y hopi di sitionan nobo a cuminsa promove nan mes na e creadornan di OnlyFans disgusta. E artista Tyga tabata promoviendo su plan di lansa un plataforma nobo yama myystar den entrevistanan, despues cu OnlyFans a anuncia nan prohibicion, bisando “nos no lo pone limite na cualkier contenido cu boso kier haci.”
“Nos tin mas di 20 aña den e industria adulto y nos ta cansa di mira trahadonan sexual ser explota pa e plataformanan cu ta genera ganashi danki na nan,” Mattie McCoy a bisa, ken su compania na Nevada tambe ta desaroyando un plataforma cu por bira un alternativa di ONlyFans pa e trahadonan sexual, yama Naughty Popcorn.
“E falta di tin un caminda online ta bay haci hopi dano na hopi diferente persona. Online ta hopi mas sigur, particularmente pa e hendenan transgenero y otronan cu no ta biba conforme na e normanan general di genero,” LaLa Zannell, ACLU su manager di Trans Justice Campaign ken ta lider di e grupo su esfuersonan pa por combati e criminalidad den trabao sexual.
Oficialnan tambe a expresa preocupacion pa cu OnlyFans. Un grupo di casi 100 miembro di Congreso a haci yamado na e Justice Department pa invesitga OnlyFans anteriormente den augustus, bisando cu e sitio tabata un “luga di empleo hopi grandi” pa videonan sexual cu ta involucra muchanan. E carta a cita e grupo anti-pornografia National Center on Sexual Exploitation, cual tin su origen den e grupo basa den fe Morality in Media, como un fuente, y tambe National Center for Missing and Exploited Children.
OnlyFans su CEO Tim Stokely a cita banconan manera Bank of New York Mellon pa e plan di prohibicion den un entrevista cu Financial Times riba diamars, bisando cu nan ta nenga e sitio su negoshi.
Companianan cu ta crea contenido adulto tin cu paga tarifanan hopi mas halto y cumpli cu rekisitonan financiero hopi mas grandi di loke mayoria di otro negoshi tin cu cumpli. Ambos Masttercard y Visa aña pasa a cuminsa blokia nan cliente di usa nan tarheta di credito riba Pornhub despues di acusacionnan cu e sitio tabatin videonan di violacion y actonan sexual cu menornan di edad. Carchinan di American Express, mientrastanto, no por ser usa pa contenido pornografico online.
“Mi kier ta optimista, pero mi ta hopi dudoso,” Phoenix Calida a bisa, un creador di OnlyFans cu ta traha cu e grupo Sex Workers Outreach Project USA. “E ta mustra manera cu OnlyFans a cambia sin consulta e trahadonan sexual, y mi no a yega di mira nada cu ta indica cu nan ta compronde dicon esaki ta un problema.
