(AP) – OnlyFans, un website unda fanaticonan ta paga creadornan pa nan potret y video, tin plan pa prohibi contenido ‘sexualmente explicito’.
E prohibicion ta bay cuminsa dia 1 di october proximo, y ta e resultado di partnernan bancario y companianan cu ta maneha e transaccionnan financiero, un vocero a bisa.
Sinembargo, mustra sunu ta ok si e ta ‘consistente’ cu politica di e compania. No ta cla kico e politica en cuestion ta, y e compania no a contesta ningun pregunta. OnlyFans ta bay comparti mas informacion ‘den proximo dianan’.
OnlyFans a bira famoso como un espacio pa celebridadnan interactua cu hende na un nivel personal, como tambe un luga unda trahadonan sexual por post y ricibi pago den un forma relativamente safe. E no ta disponibel como app via tiendanan di Apple y Google, cu ta prohibi pornografia.
OnlyFans a purba di distancia su mes di su asociacion cu pornografia, recientemente anunciando un app di streaming OFTV, cu ta disponibel pa download for di e plataformanan tecnologico mayor, y ta conta cu contenido den categorianan di fitness, cushina, comedia y musica.
OnlyFans a bisa cu tin 130 miyon usuario y 2 miyon creador cu colectivamente a gana $5 biyon. Bloomberg tabata e prome pa reporta e noticia.
