E edificio colorido cu minister Arthur Dowers di Husticia a habri ayera na B. v/d Veen Zeppenveldstraat no ta solamente un cas nobo pa instancianan manera FADA y CAA. E mester bira un ‘one stop shop’ pa esunnan cu mester informacion riba y ayudo cu adiccion. Pero tambe pa duna muchanan algo di haci enbes cu nan ta bay den droga.
“E ta un dia special awe pasobra nos ta bira colega den un luga nobo unda bo ta haya e parti preventivo y curativo. Dus bo no ta haya FADA so ora mester di un charla, pero tambe yudansa. Esaki ta un etapa nobo loke ta e parti di adiccion”, asina trahado preventivo Ruliënne Arends ta splica.
E organisacionnan ta cuminsa uni na San Nicolas pero sra. Arends ta spera cu den futuro lo pone e mesun sistema na Playa tambe. E oficinanan di FADA y CAA eynan (na Playa y Dakota) ainda ta situa diferente caminda. Riba e pregunta den cua termino lo pone nan hunto, e trahado preventivo ta bisa: “Mi ta spera cu ta den transcurso di lunanan. E parti aki na San Nicolas a bay hopi lihe tambe, el a bay den dos, tres luna.”
Sra. Arends ta bisa cu hende mester custuma ainda cu lo haya fundacionnan hunto. Pero cu esaki ta e comienso unda otro instancianan y fundacionnan ta ‘wak kico nos ta haciendo y tambe por uni’. “Pasobra mi ta kere esey ta e miho manera pa nos combati diferente problemanan social. Dus nos kier ta e ehempel tambe pa otro departamentonan por wak cu por uni y ta work out.”
FADA ta e instancia cu ta duna informacion riba adiccion pa asina conscientisa hende, y specialmente mucha y hoben pa asina preveni adiccion. CAA ta unda hende ta acudi ora ya nan tin un adiccion y kier ayudo. Awor bou un dak, bo por haya e servicionan combina: intake, screening, educacion, prevencion y tambe servicio di psikiatria, di un psicologo, enfermero, consehero, trahado preventivo y trahado social.
Muchanan uzando droga pasobra ta ferfela
Ludwina Alberts di CCA ta conta cu nan por test hende riba droga. “Nos ta haya hopi mucha, peticionnan di scol y di compania tambe. Nos ta counsel nan y trata nan te ora nan ta sali for di adiccion. Nos ta logra tambe.” Sra. Alberts ta conta cu e ta traha mas tanto cu muchanan. Unda e ta mira mayoria ta cuminsa huma marihuana pa despues uza droga mas sterki. Nos ta puntra kico e muchanan ta duna como motibo.
“Hopi mucha ta bisa mi cu nan ta haya boring. Mi ta puntra nan: dicon bo ta haya boring. Mi ta bisa nan tin hopi cos. Ora bo ta cla cu bo huiswerk, bo por hunga un wega riba computer, tin deporte. Pakico net esey bo ta bay haci (uza droga, red.) Nan ta contesta cu net esey nan ta sinti hopi bon. Pero no ta berdad. Despues di un par di tempo nan ta haya sa cu no ta berdad. ”
Pa motibo di esaki nan tambe kier cuminsa cu huiswerkbegeleiding den e edificio nobo y otro actividadnan pa tene e muchanan ocupa. Pafo nan a laga e murayanan di e edificio nobo pinta den un forma artistico y hopi colorido. Sra. Alberts: “Pa asina atrae e muchanan. Pero akinan nan tin hopi privacidad tambe.”
