Ora bo ta lesa den medionan di comunicacion di un evento riba diadomingo 20 di maart cu ta trata salud, esaki ta duna speransa cu porfin tin atencion pa haci nos pueblo mas consciente den nos manera di biba, nos habito di tur dia, pasobra esey ta primordial pa generacionnan cu ta bin.

E dia aki tabata un iniciativa di “One Happy Bowl” y “Levi Silvanie Company”, un organisacion, segun articulo den corant, cu vision pa riba termino largo nos comunidad por biba un bida mas saludabel y feliz.

E parti hipocrita ta cu e dia aki a termina den un forma grandi cu presentacion musical di Ataniro y Oruba riba un stage nobo asina yama “Backstage @ Cas di Cultura”. Un stage situa den e cura di Cas di Cultura parti patras. Dianan a traha riba e stage aki, pero tambe dianan a haci sound check den dia y hasta den marduga. Registracion haltisimo di decibel y zonido teribel di bass. Kico e concierto aki tin di haci cu salud? Net nada.

Es mas, e volumen haltisimo y zonido de base ta dañino pa bo oido, ta priva esnan den vecindad, entre otro un hotel, di trankilidad den nan mes hogar, ta causa desgusto. Den corto, e ta trece stress innecesario cu tin consecuencia pa bo salud.

Ken por compronde? Di un banda Aruba ta wordo corta den cuido medico y di otro banda nos mes ta crea actividad cu ta problema pa nos salud. Sin menciona cu e cura di Cas di Cultura ta dorna cu tent di un marca di cerbes popular. Saludabel?

E mesun presentacion di Ataniro, cu bendicion di comision organisador di fiesta riba Plaza Betico Croes, a surpasa 106.5dB! Mester tene cuenta cu veredicto di hues ta bisa cu p.e. Entertainment Center NO mag surpasa 90dB. Anto esey ta den un compleho rondona cu muraya! Diadomingo anochi na “Backstage @ Cas di Cultura” bisiñanan a registra 103.7dB.

Bayendo back na e meta di “One Happy Bowl” y “Levi Silvanie Company”, esta “vision pa riba termino largo nos comunidad por biba un bida mas saludabel y feliz”. E desordo di e concierto NO a trece felicidad alguno, es mas, e a trece mas tristeza den un vecindad cu ya caba tin hopi problema y dolor di cabes, molester y iritacion cu e exceso di volumen cu eventonan riba Plaza Betico Croes ta trece cune.

Kizas ta bon pa Sr. Siegfried Dumfries, director di Departamento di Cultura cu ta administrador di e plaza y di Cas di Cultura, grawata un rato tras di horea prome cu otorga otro permiso sin mas!

Ta bon pa keda mantene nos hendenan central, principalmente nos muchanan y nos grandinan, y tene nos mes na reglanan stipula. Cada permiso ta mara na un maximo decibel, tene bo mes na dje y no viola derecho di e vecindad pa trankilidad den su mes cas!