Ombudsman ta reporta cu gobierno esencialmente ta forsa hende comete fraude

(NLTimes) – Gobierno Hulandes esencialmante ta forsando cierto gruponan di persona structuralmente comete fraude, Ombudsman Nacional Reinier van Zutphen a bisa den un reportahe publica diamars.

E ta involucra administradornan profesional, representantenan legal y dunadornan di cuido informal cu mester haci negoshi digitalmente cu gobierno, un seguro di salud of e banco di parti di otro persona segun Trouw a reporta.

E administracion online aki ta rekeri detayenan personal pa ingresa den e forma di un DigiD. Personanan cu no por haci esaki nan mes por autorisa otro persona pa haci esaki pa nan. Pero tambe tin otro hendenan na Hulanda cu ta fisicamente of mentalmente incapacita pa duna e informacion aki en general, cual ta haci imposibel pa nan dunadornan di cuido por digitalmente aplica pa nan beneficionan of declara un invoice di cuido di salud sin cu nan comete fraude, e Ombudsman a splica.

E unico manera pa legalmente aregla cos pa e personanan aki ta personalmente, fisicamente bayendo e oficina municipal, of via post, Han Mennen di EMB Nederland, e asociacion di mayornan of familiarnan di personanan cu varios discapacidad a conta e corant. Ambos ta rekeri tempo y esfuerso. E manera mas facil ta di ingresa cu e persona su DigiD, Mennen a bisa. Esaki ta conta como fraude di identidad.

Den su reportahe, e Ombudsman tambe a señala cu varios gobierno y organisacionnan di implementacion no tin e opcion di traha cu un “autorisacion DigiD.” Esaki ta rekeri un software separa. Solamente 21 di 342 municipio Hulandes ta permiti bo digitalmente haci negoshi di parti di otro hende. “Gobierno cada biaha ta forsa hende aregla cosnan digitalmente, pero tambe mester haci esaki posibel,” Van Zutphen a bisa. Manera cosnan ta actualmente, e gobierno ta laga hende sin otro opcion cu no ta comete fraude.

Segun Mennen di EMB Nederland. Secretario di Estado Alexandra van Huffelen di Relacionnan di Reino y Digitalisacion a priminti su organisacion cu lo tapa wowo na e fraude di identidad di e dunadornan di cuido informal mientras ta yega na un solucion. Gobierno tin un decada ta priminti cu lo yega na un solucion, Van Zutphen a señala. “E no ta mustra manera e ta un prioridad, aunke e ta concerni un grupo grandi di persona.” Mas o menos 273,000 residente Hulandes ta bao administracion y otro 2.6 miyon persona no ta digitalmente apto y kier otro hende su ayudo.

Ombudsman Nacional a urgi Van Huffelen pa crea un plan dentro di 3 luna pa mehora e acceso digital pa dunadornan di cuido informal y administradornan. “E no ta bon pa tapa wowo. Si esaki ta e moralidad di nos gobierno, mi ta preocupa.”