(AP) – Ombudsman nacional a lansa un investigacion tocante con gobierno ta trata su lista di vigilancia pa terorismo. Segun e Ombudsman Reinier van Zutphen, e ciudadanonan hopi biaha no ta realisa cu nan ta riba e lista, solamente ta haya sa esaki ora cu nan no por drenta un pais of ora cu nan keda aresta den exterior. Tampoco nan no sa unda pa mira sin nan a ser registra ni con pa apela esaki.
Ombudsman a ricibi alrededor di decenas di keho for di personanan cu ta sospecha cu nan ta riba e registracion di Contraterorismo, Extremismo y Radicalisacion (CTER). Si bo persona ta riba e registro aki, e polis por comparti nan informacion cu varios agencia di siguridad, servicionan di investigacion y paisnan. Te ainda no ta cla si e autoridadnan Hulandes sa ki ta pasa cu nan data na momento cu nan comparti saki.
Ombudsman a lansa e investigacion aki pa determina si e gobierno ta trata e data aki cautelosamente pa motibo cu no haci esaki lo tin consecuencianan significante pa e ciudadanonan. Por ehempel, e por ta imposibel pa gobierno kita un registracion incorecto for di e sistema di gobiernonan den exterior, resultando cu un persona semper lo ser deteni of revisa ora cu e bishita e pais aki. “Como un ciudadano, bo mester por asumi cu e gobierno lo maneha bo data cu cautela. Specialmente si bo no ta altanto cu bo data ta ser comparti y cu ken e ta ser comparti,” Van Zutphen a bisa. “Mi ta hopi preocupa tocante esaki y awo mi lo kier sa si esaki ta suficientemente garantisa.”
Segun Van Zutphen, personanan cu ta sospecha cu nan tin un registracion di CTER no sa unda pa bay pa confirma esaki, sa dicon y entrega un apelacion. “Nos ta papia cu e ciudadanonan cu ta sinti cu nan ta ser manda di banda pa banda. Esaki ta inaceptabel,” Ombudsman a bisa. “Tur ciudadano tin e derecho di ser scucha si nan ta sospecha cu nan derechonan ta ser viola. Y esaki ta cuminsa cu sa unda bo por bay pa esaki.”
