Aruba tin su Parlamento, un Raad van Advies y un Contraloria General. Pero ainda ta falta e Ombudsman den e lista di colegionan halto di estado. “Ami lo bisa, ‘Aruba, haci bo trabao. Bo ciudadanonan, mescos cu esnan na Hulanda, tin e derecho pa por acudi na un Ombudsman. Mi ta dispuesto, unda cu ta necesario, pa yuda.”
Esey ta locual Ombudsman Nacional di Hulanda Reinier van Zutphen a bisa durante un lectura di GNA, Genootschap Aruba Nederland.
Stephan Sjouke, Hefe Asuntonan Internacional na e Nationale Ombudsman di Hulanda tabata presente durante e combersacion cu a tuma luga dilanti un grupo grandi di interesado na Hulanda, Corsou, St. Maarten y Aruba. Entre esnan cu a presencia e combersacion tabata miembro di Raad van State pa Aruba mr. Mildren Schwengle, Director di Enseñansa Annemarie Proveyer, ex Minister Marisol Lopez Tromp y tambe Eunice Saleh, Presidente di Corte Comun di Husticia y diferente studiante. Un Ombudsman ta un instituto na mesun di nivel cu Raad van Advies por ehempel cu ta atende cu kehonan di ciudadanonan riba conducta inapropia di Gobierno y ta apunta pa ley. Aruba ta e unico pais den Reino Hulandes cu no tin un Ombudsman, a pesar di a acepta e ley di Ombudsman.
Motibo pa GNA a organisa e lectura tabata e rapport “Preocupacionnan di studiantenan di Caribe,’’ cu e Ombudsman Nacional a publica na 2020 y a crea hopi discusion na nivel politico y social.
“Aruba a tuma e ley pa institui un Ombudsman, pero ta tarda cu e nombramento. E ta kere cu Arubianonan mes mester haci un peticion oficial na Parlamento, pa urgi pa e nombramento aki. “Tuma e siguiente paso ey,” van Zutphen a bisa.
Bon Dia Aruba lo amplia riba e conseho di Reinier van Zutphen den un siguiente edicion, unda ademas lo ilustra unda Aruba ta para cu e nombramento di e instituto necesario aki.
