Ombudsman di mucha: Zwarte Piet ta bay contra convenio di derecho di mucha

Zwarte Piet den su forma actual ta bay contra e convenio di derecho di mucha di Nacionnan Uni, pasobra e figura por contribui na termento, isolacion y discriminacion. P’esey Zwarte Piet mester wordo adapta pa muchanan no experiencia e efectonan negativo di fiesta di Sinterklaas.

Esaki Ombudsman di mucha a bisa den un rapport, den cual e organo independiente ta involucra su mes pa prome biaha den e debate tocante Zwarte Piet. A base di keho di hendenan, cu a pidi e Ombudsman di mucha pa un declaracion tocante e fenomeno.

Con exactamente e Zwarte Piet adapta su apariencia lo mester ta, Ombudsman di mucha Margrite Kalverboer no a bisa. Pero mayornan, scolnan y organisacionnan priva y publico ta wordo curasha pa duna Zwarte Piet un imagen nobo. “Nan mester percura pa muchanan di tur color di cuero tin placer den e fiesta aki.”

“Por medio di kita caracteristicanan discriminatorio y steroetipico di Zwarte Piet, lo por haci di dje un figura cu ta trece placer na tur cu ta disfruta di e tradicion di Sinterklaas, y na mes momento ta cuadra cu derechonan di tur mucha na Hulanda”, Kalverboer a skirbi den su conclusion.

Caricatura

Esunnan cu ta keha cu a meld cerca e Ombudsman di mucha, ta haya cu Zwarte Piet ta un caricatura cu ta e base pa alimenta discriminacion y racismo. Nan yiunan lo experiencia Zwarte Piet como ofensivo. E ultimo keho aki tabata e punto cu a prevalece pa e Ombudsman di mucha.

Cu esaki e tradicion di Zwarte Piet a wordo proba na e convenio internacional relaciona cu derechonan di mucha di Nacionnan Uni. Akiden tin para, entre otro, cu muchanan tin derecho na trato igual y na proteccion contra discriminacion. Ta e obligacion legal di e Ombudsman di mucha pa percura cu e derechonan ta wordo honra.

Adaptacion di apariencia

Pa e investigacion a papia cu tanto muchanan blanco como muchanan di color, di 10 pa 16 aña. Algun di nan a sinti nan mes discrimina durante temporada di Sinterklaas.

“Tur  hoben cu nos a papia cu ne, ta haya cu e apariencia di Zwarte Piet mester wordo adapta den caso cu tin hobennan cu ta sinti nan mes discrimina pa motibo di e apariencia actual.”

Tambe nan ta haya cu adultonan ta domina e discusion di Zwarte Piet na un manera no agradabel.

Minister Asscher di Asuntonan Social ta keda para riba su punto di bista tocante Zwarte Piet. Via Twitter el a referi na e declaracion cu el a haci aña pasa, relaciona cu e discusion.  Asscher ta haya cu Zwarte Piet mester cambia, pero e ta haya cu e no ta un tarea pa gobierno.