Despues di e reunion cu minister di transporte, sr. Otmar Oduber a sostene cu e delegadonan di e cooperativa di taxi e gremio aki a sali mas trankil. Ayera mainta e mandatario aki a reunion den sala di Conseho di Minister cu e delegacion di taxista pa duna nan un aclaracion di un MB cu el a bin cun’e y e situacion actual di cambio den permiso di taxista na Aruba.
Sr. Omar Baraud di Aruba Taxi Services (A Taxi Services) a declara na Bon Dia Aruba cu e reunion a bay den bon ambiente y e mandatario tabata hopi transparente. “Nada di loke tabata nan tabata papiando afo ariba caya cu minister esaki y minister esaya, tur esey no tabata berdad…”, el a bisa na e matutino aki.
Aunke Sr. Baraud a bisa cu esaki tabata su percepcion personal y di banda di Aruba Taxi Services, pero e ta haya cu e otro cooperativanan tabata den e mesun nivel cu nan. “E splicacion tabata cla pa tur hende…”, el a bisa. Tambe el a relata cu tur taxista presente por a tende minister Oduber su pensamento y su meta. El a bisa cu e mandatario a bin y habri tur su papelnan caminda el a demostra su e ta “transparente”.
Tur cos mescos
E ta considera cu despues di e reunion aki e mandatario a manda un mensahe “cla y raspa” pa tur taxista pafo pa traha trankil. E ta haya cu minister ta realisando un bon trabou na fabor di e taxistanan. Si ta importante pa bin cu cierto maneho di control mas stricto pa regarda e trabou di e taxistanan, Sr. Baraud a bisa cu e taxista “ta traha duro pa nan pan y tabatin un preocupante. Pero danki Dios e no tabata asina. E tabata bon cla y raspa cu tur cos ta keda mesun cos”, el a indica.
Tur impasse cu a surgi cerca e gremio di taxista cu a sali dilanti pa no hinca politica, ora cu a wordo anuncia cu minister di Transporte lo bin cu un MB pa introduci cambio den permiso di taxista na Aruba, a keda atras. “Tur cos a wordo soluciona”, asina Sr. Baraud a bisa. Un total di cinco cooperativa pa participa den e reunion aki, nan ta: A Taxi Services, Professional Taxi, TAS, Diamond Taxi y ATT
Permiso
Sr. Baraud ta considera cu e minister di Transporte tabata hopi transparente y el splica e delegacion di cooperativa di taxi e MB cu el a saca. Un punto cardinal cu a wordo aclaria y cu tabata un preocupacion cerca e taxistanan tabatin di haber cu nan permiso pa sigui core taxi. “E famia ta keda haya e permiso. Manera tur hende tabata sa, e no ta di awor, e ley ta poni di hopi tempo. Bo mester ta biba den e adres, bo mester ta yiu of nieto si bo ta biba den e adres ey”, asina sr. Baraud a declara.
E ta reconoce cu un echo cu ta sosodiendo durante e ultimo 10 aña ta cu nan ta pasa e permiso na otro persona pasobra e ta supuestamente su yiu. Pero ora cu nan ta bay Censo ta resulta cu e no ta berdad. Of apenas tabatin un luna of dos luna cu e persona ta aparece registra den e adres di e titular di e permiso. Tambe nan ta haya mas mes cu famia cu ta pasa e permiso pa e yiu, pero despues e yiu no a cumpli, nan ta bay cerca minister pa pasa esey pa otro yiu.
“E reunion a bay den bon ambiente y e minister a papia hopi transparente cu nos”, segun sr. Baraud.
E punto di e hulp chauffeur cu tabata uno cu inicialmente a crea cierto iritacion tambe a wordo aclaria. Sr. Baraud a bisa cu e mandatario a splica cu e asunto aki no ta un problema. Ya cu si e taxista tin su vakantie y e tin e permiso di un hulp chauffeur cu ta un persona cu bo tin confiansa den dje, no ta problema. Si pa motibo di kebrante di salud of e taxista ta AO pa motibo di accidente, Departamento di Transporte Publico (DTP) tin un lista di alrededor di 40 pa 50 persona, caminda e departamento aki ta ofrece e taxista un di nan pa e por na remarca pa core nan taxi tambe. “E hulp chauffeur ta un persona cu e iniciativa tambe”, el a bisa.
Proximo reunion
Na final di e reunion e taxistanan a pidi otro reunion cu minister di Transporte cu ainda no ta programa ya cu e mandatario actualmente ta ocupa cu asunto di “all inclusive”. Pero nan ta spera cu asina e mandatario tin e espacio, nan lo bolbe sinta hunto na mesa.
Sr. Baraud a bisa cu nan no tin pa exigi pa tur loke a wordo papia keda preto riba blanco. “Loke nos mes a bay pe awe ta e transparencia pa motibo di permiso, y esey el a splica nos cla ariba dje”, el a bisa.
