Milanchelo Trenidad miho conoci como Yellow no ta cera den prizon aki na Aruba sino el a wordo manda St. Maarten desde comienso di luna di maart. Esaki teniendo na cuenta e aspecto di su siguridad, segun Vocero di Ministerio Publico Ann Angela a splica.
A puntra. Sra. Angela kico ta e motibo cu Yellow a bay St. Maarten y no Hulanda por ehempel manera tabata specula cu lo a mand’e. El a bisa cu e motibo ta simplemente pasobra eynan tabatin luga pe y e motibonan ta pa siguridad di e preso.
Informacion cu nos matutino tin ta indica cu menasa a sali for di prizon aki na Aruba den direccion di Yellow, consecuentemente pa evita cualkier situacion na KIA a opta pa no cera e delincuente aki na Aruba.
E caso aki probablemente lo wordo trata prome cu juli di e aña aki (cu ta ora cu corte ta bay cu reces), y te e ora ey Yellow lo wordo treci bek pa presenta dilanti corte. Ta dificil pa bisa desde awo si esey kiermen cu e lo sinta su sentencia na St. Maarten mes of ta bay otro caminda segun Sra. Angela. “E situacion lo wordo evalua di nobo.”
Finalmente el a indica cu Yellow ta wordo acusa di a causa morto di un persona y investigacion ta andando ainda den e caso aki y no ta exclui mas detencion.
