Ayera, mediante un comunicado di prensa, Ministerio Publico informa cu a cera un acuerdo di transaccion den e caso Flamingo cu e sospechoso H.J.P. Geerman pa un suma di Afl. 125.280,13.
Geerman ta wordo sospecha di a estafa Pais Aruba y di corupcion activo di minister di Desaroyo Teritorial, Infrastructura y Medio Ambiente (ROIM) durante e periodo di prome di april 2019 te 30 di maart 2021. Den e investigacion, Geerman a wordo identifica como un asina yama ‘spookambtenaar’ of ambtenaar spirito.
Ministerio Publico ta opina cu e investigacion a mustra cu e minister a nombra Geerman como medewerker bedrijfsvoering, pero cu e no tabatin mester a haci ningun trabao a cambio y cu e no a haci ningun trabao tampoco. A cambio pa e sueldo cu el a cobra di Pais Aruba, e tabata si haci propaganda pa e minister na radio.
Ministerio Publico ta di opinion cu door di esey, Geerman a haci su mes culpable na estafa y corupcion. E suma di transaccion ta consisti di pago di un suma di placa di en total Afl. 125.280,13. A yega na e suma aki door di conta e boet di Afl. 5000,- plus henter e suma cu Geerman a ricibi inhustamente di Pais Aruba, esta, Afl. 120.280,13.
Considerando tur hecho y circunstancia, incluso e hecho cu no tin victima of partinan perhudica di kendenan nan interesnan a wordo perhudica di algun forma of otro door di realisa e transaccion aki, Ministerio Publico ta considera cu e transaccion menciona ta un acuerdo apropia pa Geerman.
Ministerio Publico a tene cuenta cu tramitacionnan den casonan similar. Ministerio Publico ta di opinion cu e suma di e transaccion ta haci husticia na e hechonan y na e rol specifico cu Geerman a hunga den e investigacion penal di Flamingo.
Ministerio Publico ta enfatisa cu e transaccion aki no tin influencia riba e curso di e proceso penal contra e otro sospechosonan den Flamingo. Si en caso Geerman keda sin cumpli cu e condicionnan palabra, e tambe lo wordo cita pa presenta dilanti Hues.
Nota di redaccion:
