Pa motibo di cierto desaroyonan cual a trece duda den e informacion cu Bon Dia Aruba a haya for di Ministerio Publico (OM) den e caso di minister Paul Croes, nos a puntra OM di nobo si material confisca a bay bek na sr. Croes. “Nada a bay bek pa Paul Croes”, e vocero a bolbe di confirma. Pa medio di un relato di prensa, diahuebs OM a reconfirma atrobe e confusion cu tabata tin riba e asunto aki, cual bo por lesa akinan.
Segun vocero Ann Angela di OM ta bisa nos diamars: “Nos ta keda riba e mes standpunt. Nada a bay bek pa Paul Croes. Cosnan cu a wordo tuma den beslag na Bestuurskantoor, na sede di gobierno di Aruba a wordo debolbe na Bestuurscollege, sede di gobierno di Aruba. Esey mi a contesta na tur hende cu a puntra mi.”
Dialuna Bon Dia Aruba a tuma contacto cu sra. Angela pa prome biaha despues a mira e noticia riba 24ora.com ‘Husticia a entrega computernan di minister Paul Croes bek’. Manera nos a publica den nos edicion di diamars e contesta di dje tabata: “Ta posibel cu cosnan a bay bek pero nada cu a wordo confisca cerca Paul Croes no a bay bek.”
Nos tambe a skirbi: e website menciona ta bisa cu Landsrecherche a entrega bek un BlackBerry, 5 computer y usb stick cu nan a confisca for di su kantoor. Pero Ministerio Publico ta desmenti esaki. “No a entrega nada bek na Paul Croes”, segun e vocero.
