Ministerio Publico (OM) ta cerca di un acuerdo di varios miyon euro pafo di corte cu ABN Amro pa faya di preveni labamento di placa a gran escala na e banco, pero tambe ta investigando e enhuiciamento criminal di individuonan, entre nan, ex-CEO Gerrit Zalm, segun Financieele Dagblad a reporta ayera.
Fuentenan cercano na ministerio di Husticia a bisa e corant cu e banco ainda mester confirma formalmente e version di eventonan presenta pa OM, pero cu un acuerdo ta casi completo. Ta spera cu e banco lo mester paga un multa di centenares di miyon di euro, e corant a bisa. Tambe mester somete su practicanan na monitoreo di banco nacional Hulandes, DNB.
OM tambe kier establece si miembronan di hunta y e presidente e tempo ey, Gerrit Zalm por ser teni personalmente responsabel y acusa di viola ley di labamento di placa y financiamento di actividad terorista cu a tuma luga bao nan mando.
E enfoke di e investigacion, cu a cuminsa na 2018, ta riba e periodo entre 2013 y 2018, tempo cu ta pensa mayoria di transaccionnan ilegal a tuma luga. Zalm tabata al mando di e banco pa henter e periodo.
