Mirando cu diamars tabata un dia cu basta rumor den comunidad pa diferente entradanan hudicial cu a tuma luga caminda tambe instancianan hudicial a drenta na sede di Gobierno esta, Bestuurkantoor y hasta den cas di Betico Croes, kantoor di rumannan di minister, entre otro, e contesta crucial mes a keda na laira: si minister Glenbert Croes ta sospechoso den e caso Portulaca.
Pa esaki Bon Dia Aruba a tuma contacto cu Ministerio Publico, unda PR di OM a confirma lo siguiente: “E minister no ta marca como sospechoso den e investigacion pa awor.”
Mientras tanto, minister di Integridad, Ursell Arends a publica un comunicado riba su rednan social unda a skirbi lo siguiente: “Awe ta un dia scur pa integridad di gobernacion na Aruba. Tin un asunto di posibel corupcion identifica den e aparato publico, cu autoridadnan a anuncia un investigacion riba algun persona cu ta traha na DIMAS y na bureau di Ministerio di Integracion, Labor y Energia. RAIZ ta para firme cu integridad no ta negociabel, y nos no lo duna declaracion suave riba corupcion. Nos mester combati corupcion cu tur nos forsa pa es motibo RAIZ tin tur confiansa cu Ministerio Publico (OM) lo conduci e investigacion na un forma corecto y sin prehuicio, pues mester duna nan espacio pa e investigacion tuma luga. Ministerio Publico a comunica kendenan ta sospechoso y tambe na unda a haci inval. RAIZ no ta cuminsa specula ni lansa acusacion sin prueba, esnan cu a haci malo mester wordo castiga, semper conforme e ley. Pa RAIZ integridad no ta negociabel y esey ta nifica cu si tin un minister di e actual gabinete bira sospechoso den un investigacion penal, e mester entrega su retiro inmediatamente. Ora cu corupcion wordo señala, nos tin un sistema pa atende cu’ne. Awe nos ta mira e sistema den pleno trabou.”
Ademas, el a sigura cu “Nos a experienci’e cu Dump Parkietenbos. Nos a experiencia mesun cos cu RWZI. Awor nos ta bibando e resultado di un modelo di bida di 5 strea sin planificacion. Persigui crecemento economico sin paga tino cu conservacion di naturalesa. Persigui desaroyo economico, sin planifica e necesidad di produccion di coriente. Gobernacion nan cu ta traha pa siguiente eleccion y ta laga nos futuro generacion nan na caya.”
Esaki a trece diferente reaccion riba rednan social caminda algun usuarionan hasta a cuestiona minister Arends pa loke ta trata su funcion den gobierno den ultimo añanan.
