Ariba dia 24 di december 2023 a tuma luga un descrubimento lamentable riba caminda di Matividiri, na unda a encontra un curpa sin bida di un persona masculino tira canto di caminda. Un noticia cu mesora a haya atencion di autoridadnan concerni pa asina cuminsa un investigacion.
Mediante un comunicado di prensa, Cuerpo di Polis a informa cu en berdad diadomingo 24 di december den oranan di anochi, pa mas o menos 7or central di polis a haya e notificacion cu lo tabatin un hende homber benta abao band’i caminda na Matividiri.
Di inmediato nan a despacha un patruya na e sitio y a notifica ambulance tambe. Na yegada di e patruya nan a topa cu un hende homber cu no tabata duna señal di bida. Ora cu ambulance a presenta, lamentablemente no por a haci nada mas.
Pa 8:35 di anochi Dr. Texier a constata morto, pero na e momento ey no a haya ningun identificacion di e persona y e caso a keda bao investigacion pa asina determina kico por a pasa cu e victima.
Dia 25 di december, autoridadnan policial a informa cu e homber cu a ser haya dia 24 di december morto banda di caminda na Matividiri a keda identifica como Sergio Maduro di 44 aña di edad. Maduro tabata empleado di DEA (Departamento di Enseñansa Aruba).
Recientemente, relaciona cu e caso aki tabatin algun rumor ta core rond na unda a indica cu Ministerio Publico lo a detene dos persona, sospechoso den e caso aki, pero cu e dos persona aki a wordo laga den libertad.
Reportero di Bon Dia Aruba a acerca vocero di Ministerio Publico, Ann Angela, pa puntra tocante e ultimo desaroyonan di e caso aki y pa confirma si en berdad e informacion aki ta corecto.
Sra. Angela a informa cu fiscal no por bisa mucho ariba e caso y cu e investigacion ta andando ainda, pero el a indica cu a detene un persona riba sospecho di heling, pero cu en berdad a laga e persona aki bay.
