OM ta confirma caso Aloe

A ricibi informacion di un caso nobo cu Ministerio Publico y Landsrecherche ta investigando. E ta un caso confirma door di vocero di Ministerio Publico, y cu ta hiba e nomber di Aloe.

A haya confirmacion di e inval cu a tuma luga na DIP unda cu a confisca computer pa analisa informacion. Noticiero EA News  por compronde cu e investigacion ta practicamente na su final y na unda cu ya caba landsrecherche a entrega algun di e articulonan cu a keda tuma den beslag back. E investigacion aki a start despues di hopi keho riba e maneho cu ta keda hiba, anti-pueblo pero tambe un maneho unilateral di parti di e director.

Pa colmo a bin ta pagando un persona di fam Sjak Shie cu ta un advisor di Gobierno den DIP, pero cu te aworaki ta problema so el a causa pa Gobierno. Diferente comerciante caba a expresa nan malcontento na e ministernan concerni y otronan a haya nan mes ta cana e caminda legal, di Corte, pa por haya contesta riba nan peticionnan. Sinembargo pronto e lo no t’ey mas na DIP ya cu su contrato a vence. Y door di e condicion pa baha gastonan, e no lo por cay mas den e presupuesto mirando cu alrededor di 10 mil florin pa luna riba e presupuesto di e bureau di minister di infrastructura e tempo ey minister Otmar Oduber, awor cu su salida di DIP  e peso di e suma ey no lo t’ey mas. Sinembargo e problemanan cu el a causa lo keda pendiente, den scochi di Gobierno.  Esaki ta comienso di e parti di vision di baha gasto di gobierno entrante.

E maneho di director di DIP, segun e empleadonan, ta laga hopi di desea. Un maneho cu ta bay totalmente contra loke ta stipula pa e forma con Gobierno saliente tabata kier pa e situacion ta. Por corda ainda un declaracion polemico di dje, ora cu el a bisa cu pa mita di aña pasa pais Aruba lo no tin tereno disponibel mas pa su ciudadanonan y cu lo mester cuminsa construi bay halto. Un declaracion cu a causa disgusto. Sinembargo, manera Bon Dia Aruba a reporta, un tereno a keda otorga na un localidad ‘prime’, violando tur e maneho stipula actualmente di (FCFS) First Come First Serve.

Aruba ta den un situacion unda mester di mas inversion pa yuda e economia draai. Comerciantenan sinembargo no a haya e cooperacion aki y mester pasa den un burocracia na momento di acudi na DIP. Ta pone un serie di condicion cu cual mester cumpli, pero asina mes cu ta cumpli, no ta haya tereno. Inversionistanan ta haya nan mes obliga di gasta placa pa bay Corte y pone Gobierno cumpli cu nan. No solamente mal gastamento di placa, pero tambe  oportunidadnan perdi.

DIP ta un departamento di Gobierno unda cu loke a keda stipula den e Acuerdo di Gobernacion mester keda ehecuta. Sinembargo ultimo tempo a bin conclui cu DIP ta un isla riba su mes, unda cu e director ta tuma decisionnan unilateral.

Tur esaki a trece un frustracion entre e empleadonan cu na mas cu un ocasion a expresa nan malcontento na Gobierno y prome minister, incluso a tene accion di protesta. E pregunta ta kico ta bay keda haci awo? Gobierno nobo lo sinta, pero tanto pueblo como inversionistanan kier sa si nan no ta bay haya nan mes den e mesun situacion atrobe.

E holor di Aloe ta stinki debi cu ta hopi ta e pregunta dicon e director no a keda manda cas mirando cu tabatin investigacion serio bao di su maneho. Ta bisto cu e director no a keda trata igual cu e otro trahadornan cu si  mester a bay cas durante investigacionnan cu a tuma luga. Na Aruba lo ta hopi importante pa implementa ley pa un, ley pa tur. E pregunta ta kico ta bay pasa awo ?

Den e di dos parti di e relato aki lo trece padilanti diferente tereno huurgrond cu no a pasa e proceso di First Come First Serve, unda cu un Guyanes a ricibi un tereno extremadamente grandi  den huurgrond, mientras cu tin Arubianonan yiu di tera wardando varios aña pa yega na remarca.

Esaki ta muestra cu e director su maneho no ta conforme e maneho stipula pa ley.