Den cuadro di e caso cu a sosode algun siman atras na de Vuyst unda a haya e hoben Sahari Sierra, 19, morto na su cas, Ministerio Publico ta laga sa cu muestranan cu a wordo tuma durante autopsia a wordo manda pa Hulanda. E investigacion ta sigui y ta sperando resultadonan di e muestranan aki.
Ministerio Publico (OM) ta laga sa cu durante e investigacion a scucha bastante testigo, tambe den e bario. Di e autopsia mes no a bisa mucho cos segun nan vocero. Pa loke ta trata e parti di violacion e ta dificil pa wak na un curpa sin bida si tabata tin violacion of no, segun OM. Claro cu por tin cierto indicacionnan, por ehempel cu el a wordo haya sin paña. Pero na e curpa mes ta dificil pa wak nan ta splica. P’esey a tuma muestranan durante e autopsia. Esakinan a wordo manda NFI (Nederland Forensisch Instituut) pa investigacion. Na man di e muestranan ey lo por determina e parti aki. Ta sperando awo resultado di esakinan pero OM no a duna nos indicacion di cuanto tempo esaki por dura.
Ningun detencion
E caso aki ta uno cu seguramente ta strobando comunidad di Aruba tambe pasobra no tin ningun detencion, sospechoso, ni ningun pista of idea di kico por a bay robes. Esaki tabata e di tres asesinato pa 2017 prome cu e caso di e dos muchanan e siman cu a pasa. Tabata tin algun rumor cu e casonan aki lo por ta conecta cu otro pasobra un manera of otro e hoben Sahari lo mester a sa algo di e maltrato. Pero Ministerio Publico a confirma cu no tin ningun conexion entre e casonan aki.
Den nos publicacion anterior riba e ultimo desaroyonan den e caso aki, nos a publica cu alto comisario a bisa cu e investigacion ta andando actualmente y cu tin cierto indicacion caba ken e persona responsabel por ta. Pero nos no a tende nada mas di esaki awo cu a pasa casi tres siman. A bisa tambe cu cualkier momento por pone man riba e sospechoso aki. Alabes e peticion na comunidad ta keda si cualkier persona por tin informacion pa por fabor yama tiplijn 11147 y nan ta garantisa cu bo ta keda anonimo.
