Den cuadro cu e padrastro sospechoso principal Gaby Martiens di e dobel tragedia cu a conmove nos comunidad e ultimo simannan aki, segun minister di Husticia na momentonan aki no tin motibo pa evalua pa e sospechoso bay Hulanda.

Esaki ta algo cu ta hopi comenta den comunidad y tambe specialmente despues di e ultimo entrevista cu e sospechoso cu a wordo publica e siman aki. Pero su siguridad di detencion ta garantisa akinan na Aruba segun minister di Husticia Andin Bikker (POR) a contesta Bon Dia.

Los di ministerio di Husticia e mandatario ta splica, tin aparatonan cu ta henter un institucion cu ta basicamente bay riba e siguridad di cada detenido. Tabata tin peticion di su abogado pa e bay Hulanda. Cada bes ta haci un analisis di siguridad di cada detenido segun minister Bikker, anto e persona akinan actualmente su siguridad di detencion ta garantisa akinan na Aruba. Tampoco no tin motibo pa bay evalua pa bay den e direccion aki segun e mandatario.

Entrevista cu sospechoso
Minister Bikker a reacciona riba e entrevista cu a tuma luga cu e siman aki cu sr. Martiens anto a tuma contacto cu departamentonan concerni. For di akinan el a compronde y informa cu desde 12 di december sr. Martiens no tin restriccion mas pa su persona. Pasobra e investigacion a yega na e fase eynan cu Ministerio Publico a tuma e decision cu no ta necesario mas pa tin restriccion segun e mandatario a sigui splica.  “Y esey ta pone cu e persona akinan por tin acceso na telefon por ehempel riba un departamento na KIA. Nos no sa precisamente con e entrevista aki a tuma luga, esey lo ta den libertad di prensa. Pero en todo caso e persona akinan no a haya bishita segun e recordnan. E por haya bishita si, pero mas bien e tin derecho di haci uzo di telefon y tin acceso via haci uzo di su abogado.”

Varios hende a reacciona hopi negativo riba e entrevista aki riba rednan social, specialmente e famia mes.

Nos a tuma nota cu nan a post comentarionan riba nan pagina di Facebook hunto cu un screenshot caminda ta mustra cu nan a puntra e medio di comunicacion con nan a haya e entrevista aki. Hopi hende a reacciona den shock na e diferente declaracionnan cu Martiens a duna.