Manera nos a informa algun dia pasa, mama di hoben Bruce Arends cu a muri den un accident na juli 2014 a haci peticion pa un investigacion nobo den e caso. Segun vocero di Ministerio Publico (OM), dia 16 di januari Hof tabata tin un decision hopi cla y mas investigacion lo no hiba na otro resultado.
Mama di Bruce Arends, Vianca Arends, tin dos luna ta warda contesta despues cu a manda un carta pa OM. Hunto cu su abogado a haci un peticion pa inicia un investigacion nobo den e caso aki mirando cu segun sra. Arends, algo no ta klop den e rapport di polis. “Si mi ta fout, mi ta acepta cu mi ta fout. Pero mi tin un derecho na un investigacion nobo,” sra. Arends a bisa Bon Dia algun dia pasa.
Reaccion OM
Ministerio Publico a bisa nos cu dia 16 di januari tabata tin un decision hopi cla di Hof riba e caso aki. “Mas investigacion lo no hiba na otro resultado. Berdad nan a pidi pa mas investigacion durante e procedura na Hof, y esey a tuma luga tambe,” vocero di OM ta bisa nos. E ta agrega cu: “Finalmente Hof a yega na e decision cu el a yega na dje den un procedura di articulo 15. Ta doloroso, pero esey ta.” Nos ta pendiente pa un reaccion di e abogado di famia Arends riba e caso aki anto e peticion nobo pa un otro investigacion.
