Pa medio di un comunicado di prensa, Ministerio Publico ta informa cu Afpakteam di Aruba ta dedicando extra atencion e temporada di vakantie aki na boetnan cu ta habri y cobransa di impuesto cu no a wordo paga ainda.
Na luna di juni hopi hende ta haya vakantiegeld, y esey ta haci cu nan tin mas espacio den nan cartera pa paga e sumanan aki, segun Ministerio Publico. Nan ta sigui bisa cu door di paga na tempo, ta evita cu un multa ta wordo aumenta of den e caso mas extremo, cu hende ta wordo deteni of haya prohibicion pa biaha.
Afpakteam di Aruba ta haci un yamada na personanan cu tin multanan atrasa of cobransanan di impuesto habri, pa bin paga esakinan. Caha di Ministerio Publico ta habri di dialuna pa diabierna 8’or pa 11.30 di mainta, y 13.00 pa 15.30 di atardi. Caha di Departamento di Impuesto ta habri dialuna te diabierna for di 7.45 pa 11.45 di mainta, y 13.15 pa 15.30 di atardi.
Afpakteam
Afpakteam ta un entidad di cooperacion di Ministerio Publico di Aruba, Cuerpo Policial, Cuerpo di Aduana, FIOT (Fiscale Inlichtingen – en opsporingsteam) Departamento di Impuesto, FIOD (Fiscale Inlichtingen – en Opsporingdienst), Marechaussee, Kustwacht, MOT y RST. E afpakteam ta combati criminalidad financiero economico, anto a cuminsa traha riba e prome di maart 2017.
