Ayera durante oranan di atardi a drenta e informacion cu e limitacion cu e minister demisionario y sospechoso principal den caso IBIS, Paul Croes, ya no ta limitacion den su aresto. Esaki nifica cu awor e por ricibi bishita y tambe sigui medionan di comunicacion, cual e no por a haci e ultimo lunanan aki.
Locual si no a cambia den e caso ta cu sr. Croes no tin acceso na su dossier. “E acceso na dossier ta los di e limitacionnan”, asina vocero di Ministerio Publico (OM) Ann Angela ta reacciona na Bon Dia. E vocero ta sigui splica cu prome cu dia 15 di november ta bay pidi 30 dia mas di su detencion. “Si hues hay’e bon, e ta keda. Despues e tin cu aparece dilanti corte pa prome biaha. Pro forma si. Eynan hues di Corte den Prome instancia ta pone un fecha pa e caso sigui y ta bolbe tuma un decision tocante su detencion.”
Bon Dia a haci e pregunta si e limitacion aki a wordo kita pa motibo cu sr. Croes lo ta papiando y cooperando awo cu e caso. E vocero di OM ta splica cu, ‘e beperking tabata pasobra tabata falta ainda di scucha cierto sospechoso y testigo y pa evita cu e sospechoso lo a trata pa influencia e personanan aki. P’esey e tabata bou limitacion’. Pues segun e vocero, no tabata tin nada di haber cu su comportacion specificamente y ta bisa cu ‘keda sin declara ta un derecho cu e tin como sospechoso’.
Nos redaccion a puntra si por yega na e conclusion e ora cu tur testigo y sospechoso pa e caso aki a wordo scucha di cual sra. Angela ta splica cu ‘falta ainda hende pa scucha, pero nos a haya cu no ta necesario mas e limitacionnan’. Tambe a haci e pregunta si ta conoci kende e otro sospechosonan ta, di cual a haya como contesta for di OM cu ‘riba e dia cu e caso pro forma bin dilanti, lo bira cla ken tur ta sospechoso den e caso’.
Kico lo pasa siguientemente ainda no ta completamente cla y ta depende specificamente riba e decision di hues si lo extende e detencion cu mas dia of no. Den caso cu hues bisa e luna aki cu e no ta bay di acuerdo pa extende e detencion y sr. Croes lo sali liber, anto no lo tin un caso pro forma tampoco. Pues lo mester warda te na momento cu e caso mes bin dilanti.
Ayera casa di sr. Croes tambe a haci un entrevista riba radio pa splica con dificil e ta p’e y nan muchanan pa no tin contacto cu nan tata. Esaki a tuma luga ayera mainta. Atardi e noticia a drenta cu husticia a dicidi di kita e limitacionnan di e sospechoso. Bon Dia tambe kier remarca cu un di e acusacionnan grave den e caso contra sr. Croes tin di haber cu traficacion di hende.
