ORANJESTAD – Pa straño cu e por zona, pa Ministerio Publico (OM) e bandera cu a ser uza durante manifestacion di diabierna cu a pasa no ta di Aruba. Esaki ta haci cu OM no lo por actua (duna boet of castigo di prizon) riba e echo.
Despues cu e potret adhunto a wordo haci publico, a bin un avalancha di comentario den pueblo pa loke ta ser un considera un falta di respet pa e bandera di Aruba. Riba e potret por mira cu sea a corta of dobla e bandera di tal manera cu no ta mira e strepinan geel cu tin riba esaki.
Bon Dia Aruba a acerca KPA y tambe Ministerio Publico, mirando cu den ley* ta papia specificamente over di sea castigo di prizon pa maximo di 2 luna of un boet di maximo 3 mil florin pa personanan cu ta falta respet na nos bandera publicamente. Te na e momento aki, KPA no a contesta preguntanan di Bon Dia Aruba.
“No tin sprake di echo castigabel pasobra no ta trata bandera di Aruba”, tabata e contesta corto di Ministerio Publico. E vocero di OM a sigui splica cu “pa e conta como bandera di Aruba, e mester ta completo”. Pues como cu no por a mira e strepinan geel, Ministerio Publico no ta considera esaki di ta bandera di Aruba.
Ley: Landsverordening houdende regelen betreffende de vlag, het wapen en het volkslied van Aruba.
Artikel 8: 1. Hij die zich in het openbaar latdunkend uitlaat over de vlag, het wapen of het volkslied dan wel de vlag of het wapen bezoedelt, verbrandt od anderszins niet de gepaste eerbied betoont jegens de vlag, het wapen of het volkslied wordt gestraft met hechtenis van ten hoogste twee maanden of geldboete van ten hoogste drieduizend florin.
