Minister Paul Croes a wordo deteni ayera mainta relaciona cu caso di investigacion Ibis. Ministerio Publico (OM) ta laga sa cu resultadonan di material confisca den luna di maart tabata suficiente pa bay over na detene sr. Croes.

Ayera mainta e noticia a capta comunidad di Aruba y te hasta yega a yega Hulanda trempan unda De Telegraaf a trec’e. Sinembargo e tabata algo cu pa basta tempo tabata den aire. Durante un rueda di prensa di Ministerio Publico, procurador general di Aruba Alexander van Dam ta laga sa cu e ultimo lunanan nan no a para keto pa locual ta e investigacion aki. “Nos ta trata tur caso cu hopi cautela. Nos a ocupa nos mes e ultimo lunanan cu e analisis di administracion y confiscacion digital (computers, telefon, USB-sticks). Anto na dado momento nos a yega na e conclusion pa a bay over na detencion. Manera cu nos a haya e resultadonan di locual nos a confisca den maart, tabata suficiente motibo pa detencion.”

Den un relato manda pa prensa OM ta bisa cu a detene ex-minister di Labor cual crea un poco confusion. Paul Croes ainda ta minister sinembargo su carteranan entre otro di Labor a bay pa minister Angel Bermudez.

Na e momento aki tin cinco persona deteni den e caso aki y mas material a wordo confisca na cas di sr. Croes ayera. Ministerio Publico no ta descarta cu lo por bin mas detencion, mirando cu ainda mester wak tambe e declaracion di esunnan recientemente deteni. “Despues di e declaracionnan, si lo tin declaracionnan, mas investigacion y analisis di mas cosnan confisca , e ora por generalmente conduci na mas detencion.”


Sospecho di fraude
E sospecho riba sr. Croes ta cu e corupcion administrativo ta encera primordialmente cu e tabata pidi/of tuma placa di soborno en cambio di un exencion (ontheffing) di e toets di arbeidsmarkt. Un arbeidsmarkttoets positivo di parti di Departamento di Progreso Laboral (DPL) of un ontheffing di esaki ta un condicion pa Dimas saca un permiso di trabao na Aruba. Segun Ministerio Publico, e ontheffing nan tabata wordo saca door di e minister, den mayoria di e casonan, despues cu DPL a duna conseho negativo. Cu e ontheffing aki, e stranheronan tabata por a haya permiso di trabao. Durante e investigacion a lanta e sospecho cu e minister a haci su mes entre otro culpabel di labamento di placa, abuso di poder, y pone hende na trabao ilegalmente.

Dos otro persona deteni ayera
Fuera di sr. Croes, Ministerio Publico a confirma detencion di un otro persona masculino cu ta un empleado di sr. Croes kende lo bay bao interogacion tambe. Warda nos Costa a bay cu un dama stranhero cu tabata na e cas di sr. Croes. Lo tabata di wordo investiga si e dama aki ta ilegalmente na Aruba, si e mag di traha, of si el a traha pa e minister. A bin resulta cu e no ta indocumenta of trahando ilegalmente , pues el a keda den libertad despues di pasa e procedura.
Desde 28 di maart 2017, un total di 30 testigo y 21 sospechoso a wordo scucha. Ocho di e sospechosonan ey a wordo deteni pa interogacion. Di e ocho persona aki, tres te ainda ta den detencion. E sospechosonan cu ta den libertad, ta sigui como sospechoso den e investigacion segun Ministerio Publico. E decision tocante cua di e sospechosonan aki lo wordo persigui, lo wordo tuma pa Ministerio Publico na momento cu e investigacion ta cla.

A rista dos luga comercial
Den cuadro cu e investigacion, autoridadnan a rista tres luga (un cas y dos luga comercial). Funcionarionan di LR, RST y polis tabata envolvi den esakinan. A confisca mas administracion y cargado di informacion. E sospechosonan deteni ayera ta cera unda nan acceso ta limita. Esey kiermen cu nan no mag di tin contacto cu ningun hende fuera di nan abogado. Banda di esey tin un ordo contra e minister cu e no mag di haya su documentonan. E minister lo wordo confronta durante e interogacionnan cu e resultadonan di e investigacion. Pa e motibo ey, Ministerio Publico a laga sa cu nan lo ta hopi reserva ora di duna informacion tocante e investigacion, cual tabata notabel ayera durante nan rueda di prensa.

Strategia di gara ‘piscanan chikito’ prome
E procurador general a menciona cu cada investigacion ta exigi un tipo di strategia. Den e investigacion aki, e ta bisa cu e strategia cu nan a dicidi di implementa tabata pa prome gara e piscanan chikito.
Pues a bay over na deteni sospechosonan liga na e minister y a base di nan declaracionnan y resultado di materialnan confisca, por a cuminsa na bay mas ariba pa detencion. Sr.Van Dam: “E ta un tipo di strategia cu ta wordo uza mayoria di biaha den investigacion di fraude. E tipo di investigacionnan manera esaki mayoria di biaha ta tarda mas cu tur otro tipo di investigacion.” Ministerio Publico ta subraya cu sr. Croes lo wordo trata manera tur otro sospechoso y nada lo bay diferente pasobra e ta un mandatario.

Reaccion di gobierno y partido AVP
Ayera aparentemente tur e candidatonan (AVP) a wordo pidi pa bini hunto un rato na cas di partido na Playa unda posiblemente a discuti riba e tema, pero nos no a haya reaccion for di nan ora cu nan a sali. Locual nos a compronde for di un fuente in oficial, minister president Mike Eman a suspende su programa di campaña ayera pa por a trata cu esaki. Durante un rueda di prensa tocante ultimo desaroyo di Repsol ayera tardi, minister Mike de Meza tampoco kier a reacciona riba e noticia di detencion di sr. Croes. El a laga sa si cu gobierno pronto lo bin cu un declaracion riba esaki.