(CuraçaoChronicle) – E trato mas cuidadoso di victima, particularmente victima di crimen sexual, tabata central durante un ‘themadag’ organisa pa Oficina di Procurador General di Corsou, St. Maarten, Bonaire, St. Eustatius y Saba, OM Carib.

Socionan dentro di cadena hudicial di e parti Caribense di Reino Hulandes a reuni na Corsou diahuebs ultimo, dia 26 di agusutus.

E ‘themadag’ cu a tuma luga na Acoya Curaçao, a conta cu presencia di participantenan di forsa policial, corte, slachtofferhulp y empleadonan di oficina di Procurador General, kendenan ta responsabel pa combati crimen sexual y tambe pa cuido di victima. A scoge e topico specialmente pa enfoca riba ofensanan sexual y pa pone mas enfasis riba e posicion y cuido di victima di e ofensanan aki.

Segun oficina di Procurador General, e ley criminal completamente ta indica con mester trata sospechoso y esnan cu comete crimen. “Pero mester duna mas atencion na e victima, specialmente den casonan di violencia sexual. Ofensanan sexual ta constitui violacionnan serio di integridad fisico y mental, como tambe e castidad di e victima. Crimennan sexual ta serio pa motibo di e impacto cu tin riba esnan involucra, nan ambiente y sociedad den su totalidad. Pa e motibo aki ta di sumo importancia pa profesionalnan den e ramo aki tin e habilidadnan necesario pa cuida e victimanan.”

Varios experto den ramo di combati crimen sexual a duna presentacion na 40 participante.

Den contexto di Plan Nacional di Corsou pa combati violencia contra mucha, como tambe violencia domestico y relacional, minister Ruthmila Larmonie-Cecilia di Desaroyo Social, Labor y Bienestar SOAW tambe a contribui riba e dia, ya cu e ta mira como algo cu ta pas dentro di e obhetivo di reforsa experticio na varios nivel y den varios aspecto.

E ‘themadag’ pa e motibo aki tabata conta cu sosten completo di ministerio di Husticia y ministerio SOAW di Corsou, como tambe ministerio di Husticia di Hulanda.
Na final di e dia, Procurador General OM Carib, Ton Maan a curasha e participantenan pa aplica e conocemento adkiri na nan proceduranan laboral. E gol maximo di e dia tabata pa duna miho cuido na e victimanan di violencia sexual y pa logra sali como un persistencia, pa nan propio bienestar y esun di comunidad.

E comite di organisacion di e ‘themadag’ a consisti di team di OM Carib, y lider di team KPSM pa casonan di crimen sexual di forsa di polis di St. Maarten, Dientje John-Muller.

Potret: Curaçao.nu.