Riba 3 di juli ultimo, un relato di prensa a wordo publica cu tabata contene un yamada pa paga boetnan atrasa y vorderingnan di belasting.
Segun relato di vocero di Ministerio Publico Ann Angela, ‘e accion di Afpakteam Integral di Aruba pa loke ta cobramento di boetnan atrasa y vorderingnan di belasting a duna bon resultado.’
“Relaciona cu e relato publica riba 3 di juli, entre otro, Ministerio Publico a cobra un suma di Afl. 57.695,-. y Departamento di Impuesto a cobra un suma di Afl. 259.188,- den e siman di 3 pa 10 di juli ultimo”, sra. Angela a informa.
Den nomber di Ministerio Publico y Departamento di Impuesto, Afpakteam ta bolbe haci un yamada na personanan cu tin boetnan atrasa of vorderingnan habri pa bin paga.
Caha di Ministerio Publico ta habri di dialuna pa diabierna di 8.00or di mainta pa 11.30or di merdia y di 1.00or pa 3.30or di atardi.
Caha di Departamento di Impuesto ta habri di dialuna pa diabierna di 07.45or di mainta pa 11.45or di merdia y di 1.15or pa 3.30or di atardi.
Segun relato di sra. Angela, Afpakteam ta dedica na combati criminalidad financiero economico y a cuminsa traha riba prome di maart di e aña aki. Si bo persona tin informacion tocante señalnan di labamento di placa, acerca Afpakteam via mail afpakteam@kparuba.com of via tiplijn: 11141.
Afpakteam ta un cooperacion entre Ministerio Publico (OM), Cuerpo Policial di Aruba, Aduana, Fiot (Fiscale inlichtingen- en opsporingsteam), Departamento di Impuesto, FIOD (Fiscale Inlichtingen- en Opsporingsdienst), KMar (Koninklijke Marechaussee), Kustwacht di Aruba, Meldpunt (Meldpunt Ongebruikelijke Transacties) y RST.
