Den cuadro cu situacion hopi lamentabel den caso di tiramento mortal na Wayaca diamars merdia, segun Ministerio Publico a confirma Bon Dia Aruba, den nan punto di bista e sospechoso ta na Aruba ainda y di nan parti no por specifica ki direccion e por a bay y si ta herida di bala e la ricibi of algo otro.
”Ta suplica e publico pa sigui vigilante y si bo nota algo sospechoso, raro of cu no ta klop, meld esey mesora na Polis. E adelantonan cu a wordo haci te awor tabata grandemente danki na tipsnan valioso di ciudadanonan y nos ta spera cu hendenan lo sigui yuda nos pa gara e persona of personanan responsabel pa e acto teribel aki,” vocero di Ministerio Publico sra. Ann Angela ta bisa. Sra. Angela ta pone enfasis riba e hecho cu e sospechoso ta herida dus hendenan mester keda atento riba esey. E curpa di e victima ta den beslag pa asina un patologo cu ta bay bini for di Curacao haci e autopsia riba e curpa dialuna 19 di september. Ministerio Publico no por confirma si e otro victima, esta e casa cu a wordo herida, a haya herida di bala of algo otro tampoco. E caso aki a impacta pueblo asina hopi cu lidernan di fraccion y parlamentarionan a yama pa un reunion urgente na parlamento diaranson mainta unda Minister di Hustia Arthur Dowers, hefe comisario di polis y representante di otro departamentonan di husticia a presenta pa contesta pregunta relaciona cu topiconan di siguridad y dialoga riba esaki.
Ningun confirmacion di pertenencia horta
Vocero di Cuerpo Policial, sr. Lito Lacle ta bisa cu e sospechoso cu nan ta buscando, (entre 35 pa 40 aña di edad, 1.78m haltura) cual ainda ta uno y no tin indicacion cu tin mas sospechoso, ta papia papiamento y e por tin un estilo ‘guajiro’ unda cu su wowonan lo ta mustra poco Chines. Bon Dia Aruba a puntra sr. Lacle si polis por a confirma finalmente si tabata tin pertenencia di balor den e cas anto si algo a wordo horta pa locual ainda nada por wordo confirma pa polis of Ministerio Publico ainda.
Sra. Shasha tabata doño di un bar/restaurant
E victima Sra. Shui K Fong Fan, miho conoci como Shasha, a naci na Canton, China 18 di Juli 1951. Shasha tabata doño di un Bar/Restaurant na Noord yama Sha Sha Oasis Bar & Restaurant unda cu Bon Dia Aruba a bishita y papia cu un empleado. Empleado di e luga ta conta Bon Dia Aruba cu nunca nan a haya ningun problema den e negoshi, ningun intento di atraco den pasado y cu e crimen aki ta algo hopi shocking anto inespera. Empleado mes no por a comunica cu e otro persona cu a sali herida, esta e casa di sra. Sha Sha pa motibo cu su telefon ta paga desde e incidente. E no tabata sa di e paradero di e persona y a puntra Bon Dia Aruba si e persona berdad a sali for di hospital y si e tabata ok. Bon Dia Aruba a acudi na polis y Ministerio Publico pa locual ta detayenan di e paradero di e persona herida pa locual Ministerio Publico a contesta ”E lo a sali for di hospital pasobra e no mester keda mas.”
