OM: ‘A acerca e denuncia di ekiponan perdi den completo neutralidad’

Ministerio Publico a ricibi siman pasa un denuncia for di cual a resulta cu señor E.C. posiblemente a haci su mes culpabel na malversacion di algun propiedad cu lo ta perdi di bestuurskantoor desde entrego di gobierno anterior na gobierno actual. Nos a puntra OM tocante algun declaracion y rumornan bayendo rond tocante e caso aki di cual nan a desmenti.

Den varios medio di comunicacion e topico aki a wordo poni den un contexto mucho mas amplio, y por medio di esey el a haya ‘un dinamismo bastante particular’ segun Ministerio Publico. Na prome instante tabata tin tres detencion unda cu e prome persona a sali liber algun dia despues, esta L.P. Despues a bin prolongacion di detencion di M.E. te cu a lag’e den libertad tambe e siman cu a pasa. Ministerio Publico di su parti ta haya importante pa enfatisa cu e denuncia contra e otro sospechoso E.C. a wordo husga unicamente riba su meritonan penal. Y tambe cu ta a base di esey so Ministerio Publico a traha riba e aangifte. Segun Ministerio Publico, nan a acerca e denuncia den completo neutralidad.

Mescos cu den cualkier otro caso, a cuminsa un investigacion penal obhetivo. Den e investigacion aki a scucha varios persona envolvi, y a haci entrada hudicial bao guia di Hues Comisario, unda algun cos a wordo confisca. Tur e pasonan aki cu Ministerio Publico a tuma, tabatin nan hustificacion den e informacion cu na e momento ey tabata disponibel segun nan ta informa.

Aunke Ministerio Publico no a keda cla cu e investigacion ainda, no tabata necesario mas na e altura aki di e investigacion pa e sospechoso Marko Espinosa keda den detencion. P’esey el a wordo poni den libertad riba 13 di december ultimo.

Nos a puntra Ministerio Publico riba e declaracionnan cu a bin for di coleganan di 24ora.com cu ta bisa cu e ekiponan cu ta haci falta ‘ta mas cerca di loke gobierno ta kere’. Dunando indicacion directo cu e persona cu tin e ekiponan aki ta canando aworaki mes den Bestuurskantoor. Ministerio Publico a desmenti esaki bisando cu: “Tur lo demas cu ta wordo menciona no tin di haber cu e investigacion y cu loke OM ta haci y concerni. Nan ta cosnan cu ta forma parti di e dinamismo hopi pero hopi particular cu a forma rond di e caso aki.”