Ayera mainta den Corte di Apelacion di Aruba a continua cu tratamento di caso Avestruz. Ayera a marca un siman cu e corte a cuminsa cu e tratamento di e caso aki y Ministerio Publico (OM) a presenta su rekisitorio pa e caso aki.
Den su rekisitorio e abogado general di OM a cuminsa splica primeramente kico ta e nucleo di caso y despues a pasa detayadamente ariba e acusacionnan di cada un di e shete sospechosonan di e caso aki, cual tur shete tabata presenta den corte tambe ayera mainta.
Manera ya caba a wordo indica na mas di un ocasion, y cual a keda remarca un biaha mas ayera mainta pa e abogado general di OM, caso Avestruz ta draai rond di supuesto iregularidadnan cu tabata sucede den e proceso di otorgamento di opcion pa tereno erfpacht durante e tempo cu e sospechoso y actual parlamentario Benny Sevinger tabata fungi como minister di Infrastructura for di aña 2009 pa 2017.
OM ta indica cu e sospecha mas grandi ta cu Sevinger, sospechoso principal tambe den e caso, tabata entrega tereno(nan) na persona- y/of amigonan cu tabata vincula na su partido politico AVP, y e personanan aki no tabata usa dicho tereno(nan) pa proyectonan, manera cu tabata wordo indica, pero tabata pasa over na bende esakinan na prijsnan significantemente halto y cual tabata beneficia e personanan aki como tambe Sevinger.
Durante su rekisitorio Ministerio Publico a remarca cu ta trata un cuestion di integridad y cu no ta basa riba si e actonan cometi pa e shete sospechosonan a bay manera cu ley ta prescribi of no. E abogado general ta enfatisa cu e punto cardinal ta cu e sospechosonan, a traves di diferente compania a gaña di tin intencion pa desaroya proyectonan riba e terenonan comercial cu nan a ricibi, pero na final e meta tabata pa bende esakinan pa sumanan cuantioso y di e forma aki estafa pais Aruba.
OM a resalta tambe punto di relacion personal di algun di e sospechosonan cu e sospechoso principal, ex minister Sevinger. El a trece pa dilanti e punto di abuso di Sevinger den su funcion como minister e tempo ey y con su actonan tabata e viola integridad.
Manera ta conoci tambe e caso di apelacion aki ta basa riba e apelacion di tur shete sospechoso ariba nan sentencia y apelacion di Ministerio Publico ariba e sentencia cu Corte den Prome Instancia a duna na e sospechosonan Sevinger, Arends y Sussebeek.
OM ta sali di e punto di bista cu hues den prome instancia mester a sentencia e tres sospechosonan aki ariba algun acusacion specifico. acusacion cu nos t haya cu hues den prome instancia mester.
Pa loke ta e castigonan cu a wordo pidi, den su mayoria e castigonan cu Corte den Prome Instancia a duna a keda mescos, pero den e caso di e tres sospechosonan cu OM a apela nan sentencia, ta pidi pa hues principal tratando e caso di apelacion revoca e sentencia aki.
Den caso di sospechoso Sussebeek OM a pidi tres aña, pero durante e prome caso el a wordo sentencia na dos aña di prizon, di cual un aña ta condicional. Den e caso di Arends a pidi pa sentencia e sospechoso na tres aña di prison y el a wordo sentencia na dos aña, di cual un aña tambe ta condicional.
Por ultimo pa e sospechoso principal, Sevinger durante e prome caso OM a pidi inicialmente cinco aña y hues den prome instancia a duna un sentencia di un aña y seis luna di esaki tabata condicional. Pa loke ta e caso den HOF, OM a pidi un castigo di cuater aña di prison, kitando e tempo di aresto preventivo, prohibicion di tin un funcion publico (di gobierno) y a kita su derecho di voto pasivo pa 8 aña largo.
Prome cu e tratamento di caso Avestruz a continua den corte, dialuna mainta tambe a tuma luga un “reggiezitting” di un caso di expropiacion contra e ex minister, actual parlamentario y principal sospechoso den caso Avestruz, Sevinger.
Hues a determina, riba peticion di abogado di e sospechoso Sevinger, David Kock, cu e caso specifico aki ta bay cuminsa den luna di october pasobra e kier warda pa e sentencia di HOF prome ariba loke ta e caso Avestruz.
Na su turno e fiscal di OM a bay di acuerdo cu e decision aki y no a mustra ningun obhecion. Hues a palabra cu ambos partido cu dia 21 di october ta bay tuma luga e “reggiezitting” manera debe ser pa asina por mira kico ta e progreso di e caso aki.
Den e caso aki Ministerio Publico ta exigi Sevinger pa paga un suma di mas di 900 mil florin bek. Si no cumpli cu esaki Sevinger tin posibilidad di wordo sentencia na castigo di prison. Mester remarca cu pa e caso specifico aki tambe OM a coy beslag di Sevinger su cas pa dicho suma.
Abogado di Sevinger, Sr. Kock tabatin obhecion pa e suma aki y a indica cu mester verifica kico e suma ta bay bira ya cu den Corte den Prome Instancia, hues a descarta e gran cantidad di e acusacionnan contra Sevinger y a dicta un castigo pa e posible malversacion di fondo di su e fundacion di Sevinger, esta Fundacion Bon Curason (FBC) y esaki ta nifica e ora cu e suma lo mester baha significantemente.
