Gobierno kier actua mañan, kisas…
Aparentemente nos autoridadnan cu tin cu atende asunto di inmigracion y estadia na nos pais no ta consciente ainda di e magnitud di un problema cu tin e ciudadano mes preocupa pa hopi tempo caba. Pasobra e si ta ripara kico ta pasa ora un pais bisiña enorme manera Venezuela ta den crisis y su hendenan ta buscando caminda di bay. Ta e ciudadano cu ta biba den e barionan ta ripara cu tur tipo di apartamento y cas di famia ta yena cu e ‘turistanan’ aki. Ta nan e ta topa den grupo na ATM, ocupando e mashin pa tanto tempo, te cu nan tur caba di purba dies carchi diferente di cual mayoria no ta traha. Te hasta tin caso conoci di ciudadano cu ta ser molestia pa ‘turista’ cu kier cambia florin pa dollar. Tambe tin caso di hende cu a keda agredi pa e gruponan aki, hasta riba parkeerplaats di banco.
Cu di e cien miles di persona procedente di Venezuela, mayoria ta bolbe nan pais, ta berdad pero esey no ta e issue! E asunto ta cuanto ta keda atras y kico ta haciendo riba esey! E contesta oficial no por tabata mas ridiculo, pero a keda publica e siman aki. E genionan cu ta rondona nos mandatarionan a bin riba e tremendo idea pa bay cobra mas pa e turistanan cu ta desea di prolonga nan estadia legal na Aruba… Ma shonnan, por fabor, nos ta papiando di e miles cu ta kedando atras, sin molestia nan mes pa pidi prolongacion, ni mucho menos awor bay paga extra pa esaki. Nan ta simplemente keda Aruba, y cuminsa traha of haci negoshi segun cu oportunidad presenta, y e probabilidad cu ta gara nan ta masha chikito. Y pakico? Pasobra no ta pone esfuerso riba busca activamente esunnan cu nan estadia legal di turista a vence y cu mester ta conoci na autoridadnan.
Pakico por ehemplo ministro di Husticia recientemente por a declara exactamente cuanto Venezolano a keda atras den e aña aki? Pasobra nos autoridadnan ta dispone desde hopi aña caba di un sistema automatisa cu tin tur dato al caso di esunnan cu a drenta, unda nan lo a bay keda, ken eventualmente a para garantia pa nan, y ki dia nan mester a sali y no a haci esey. For di nos hermana isla Curaçao nos por comprende for di declaracion di autoridadnan cu nan ta uzando e informacion aki pa activamente busca esunnan cu a keda atras pa por gara y saca nan for di e isla. Nos a tende nos autoridadnan papia den e sentido aki? No, al contrario, nan ta bin riba e genial idea pa bay cobra e poco cu ta pidi prolongacion di estadia oficialmente. De paso nan ta yuda henter e sector cu ta haci tramite di permiso poniendo mas pan riba mesa pa nan, aunke nos no tabatin e impresion cu e sector aki tabata muriendo pa falta di trabao y no mester ta e prome preocupacion pa nos autoridadnan tampoco.
Loke si nos mester a tende ta con e diferente autoridadnan ta combina forsa pa haci accion conhuntamente, cu informacion digital na man, pa gara y saca e inmigrantenan no desea aki for di nos isla. Ta asina dificil pa comprende esaki? Naturalmente esaki lo significa cu mester pone mas recurso disponibel, sigur pa cuerpo policial, pero tambe pa e otro instancianan envolvi. Aki ta unda e enorme desperdicio di placa publico den e periodo di gobernacion desde 2009, cu a crea e fiesta di patronahe politico mas grandi di nos historia, ta bira contra nos, pasobra awor diripiente “no hay dinerooo”. Awor nos por ripara kico ta significa derocha placa na emplea bo mes simpatisantenan na cantidad pa crea bo mes coro di aplauso, anto awor no tin recurso financiero y humano na unda nos mester di nan pa contene e problema creciente aki.
Y pa nos atende de paso tambe e aspecto di para garantia pa un stranhero cu ta bin di bishita na Aruba, di cual nos mandatario di Husticia a declara algun dia pasa cu aparentemente esaki ta birando un ‘negoshi’, lo siguiente: ora como mandatario bo ta señala algo como un problema, lo ta bon pa bo duna di biaha algun indicacion cu bo a pensa caba den direccion di un posibel solucion. Si no, miho bo keda ‘callao’. Pasobra kico ta e caso? Si nos no kier e tipo di ‘negoshi’ aki, ta ken mester bin cu regla pa un residente na Aruba, Arubiano o stranhero, no por para garantia pa tanto hende cu esaki claramente ta indica sospecho di un negoshi? Nos como ciudadano mester haci esey, o e ministro cu ta haya un salario pa traha y tuma encargo di e area di gobernacion cu el a acepta boluntariamente?
Si mas di 4000 Venezolano kedando atras den ultimo temponan no ta preocupa nos mandatario di Husticia ainda, e pregunta na su persona ta masha simpel: na ki cifra bo tin pensa di bira preocupa y cuminsa actua?
