Un aña a pasa caba despues cu pandemia di Covid-19 a yega na Aruba treciendo diferente reto pa diferente sector, incluyendo esun di musiconan y entretenimento.

Pa cu esaki, Bon Dia Aruba a tuma contacto cu Ofo Escudero ken ta presidente di e asociacion Aruba Entertainment 2020 y el a ofrece un declaracion pa trece dilanti e situacion cu e sector aki ta bin bibando den un aña di pandemia.

Escudero a señala cu nan a publica un video riba nan rednan social pa asina corda esunnan concerni cu tin e poder di yuda nan, den caso aki prome minister Evelyn Wever-Croes, minister di Finansa, Asuntonan Economico y Cultura Xiomara Maduro y minister di Husticia Andin Bikker cu ta esun cu ta firma e reglamento ministerial hunto cu Crisis Team cu ta adviser e medidanan conhuntamente cu DVG.

El a indica cu nan a manda un video pa nan corda cu e area di entretenimento tin mas di un aña caba den e situacion aki, na unda cu segun el a sigura nan tin basta luna caba cu algun di nan no ta traha y tambe cu e medida cu Crisis Team a trece dilanti ta establece cu solamente un musico por traha pero no como agrupacion musical, ademas cu contando tur persona cu ta traha den sector aki no tin hopi luga pa nan por bay toca na cada establecimento.

Tambe mester corda riba otro tipo di trahadonan di e sector cu ta depende di otro pa nan por traha, tambe cu Escudero a manifesta cu no ta tur ora un persona por traha su so, pa e motibo aki nan a traha un video den e cual nan ta splica cu e mayoria di nan no tin caminda pa bay y tur di nan ta na cas, incluyendo e dianan liber.

Escudero a menciona cu loke nan ta espera ta un pronto contesta di esunnan cu a wordo menciona caba, cu den henter aña cu a pasa desde cu pandemia a trece e crisis nan tabata keto y nan a acepta tur condicion den e tempo aki y tur lo cual a wordo bisa pa nan, “nos tambe tabata kier ta parti di e proceso pa por combati tur esakinan, pero nos a sinti cu aworaki tur cos ta mustra cu e ta basta safe y na su luga pa nos por cuminsa eherce nos trabao back”, el a declara.

Asina mes, el a expresa cu nan ta kere cu den tempo normal e proceso ta bay poco a poco y “nos no tin ningun problema cu esey, pero basta pa nos cuminsa na avansa di lo cual cu nos tin awor”, Escudero a finalisa cu nan ta espera cu ora lo flexibilisa medidanan anti-covid por tuma e sector di musiconan y di entretenimento na cuenta.

Na luna di januari, Aruba Entertainment 2020 a ofrece un conferencia di prensa na unda nan a haci un peticion pa Crisis Team y esey tambe a bin na mesa den reunionnan cu Departamento di Cultura (DCA) pa lo cual tabatin di haber pa nan por sigui traha.

Esaki tabata depende principalmente di e casonan di Covid-19 na e momento ey, pero na e momentonan aki e situacion a cambia y e casonan a cuminsa baha, ademas di e jornada di vacunacion cu gobierno a bin implementando pa Aruba por sali di e crisis di un manera mas lihe.

For di luna di maart di aña pasa e sector aki di entretenimento a resulta hopi golpia debi na e pandemia di Covid-19 y tur e medidanan cu a bin cune pa evita e contagio, entre nan distanciamento social y evita aglomeracion di hende. Un gran parti di nan ta depende directamente di e actividad aki y nan ta practicamente man crusa pa mas di un aña caba.