(NLTimes)—E oficina di inmigracion y naturalisacion na Hulanda (IND) a indica cu apenas e por sigui sostene e nivel di trabou cu tin awo, y ta boga pa “otro opcionnan fundamental den politica di inmigracion.” Den un reportahe publica diamars tocante e estado di e oficina, e servicio a adverti cu e ta “yegando su limitenan.”
No solamente e cantidad di aplicacion pa asilo ta subiendo, sino tambe e cantidad di aplicacion pa trahadonan di conocemento, migrantenan di labor y studiantenan internacional cu kier keda na Hulanda. Ademas, e politica ta birando “cada bes mas complica,” y cu legislacion ta obliga e servicio pa haci interaccion, cual no tin ningun uzo den practica.
Rhodia Maas, Director-Generaal di IND, a splica cu su servicio ta enfrentando un “division imposibel.” Pa via di e decisionnan di e servicio tin un impacto grandi, IND kier ta capabel pa “tuma e tempo pa tende e storia personal di cada aplicante. Na mesun momento, empleadonan ta bou presion pa encarga cu peticionnan na un manera mas lihe.
Gobierno ta spera mas cu 70.000 buscado di asilo ta yega Hulanda e aña aki. E capacidad pa encarga cu e peticionnan ey actualmente no ta suficiente. E ora IND mester paga multa mas frecuente pasobra decisionnan ta tuma hopi tempo. Esaki no ta un falta di ta dispuesto pa move mas lihe, “sino tin tiki capacidad pa encarga cu e cantidad di aplicacionnan dentro di e termo legal,” Maas a skirbi.
“Ta doloroso pa nota cu esaki no ta bay cambia pa awo,” e hefe a añadi. P’esey ta urgentemente necesario pa reevalua con migracion y politica di inmigracion “ta keda manehabel y realistico.”
Pa cuminsa, e servicio kier haci acuerdonan di largo plaso cu e Ministerio di Husticia y Seguridad, cual ta encarga cu IND. Actualmente ta determina anualmente con hopi aplicacion INd mester procesa. Esey ta “demasiado cortico pa set up un organisacion stabiel,” segun e oficina. “Pa un fundeshi solido, nos mester por mira adelanta pa al menos cinco aña.”
Reglanan tambe ta algo cu ta stroba. Por ehempel, huesnan ta demandando mas rekisito ainda pa e hustificacion di rechaso. Tambe, segun IND, “tin demasiado momento di interaccion cu ta obligatorio pa ley y regulacion, cual ta redundante pa ambos IND y e aplicante.”
Un otro problema ta e procedura di reunion di famia. Si un aplicacion pa asilo wordo aproba, mayornan y yiunan di un persona cu status di residencia tambe por bin Hulanda. Den caso si tin un yiu adulto, tin biaha nan por trece nan pareha y yiu tambe. “E procedura di reunion di famia no ta diseña pa esaki,” IND a declara.
