Minister di Asunto Economico, Comunicación y Desaroyo Sostenible, Geoffrey Wever tabatin e oportunidad pa bishita y inspecciona e edificio den pleno renobacion den Oranjestraat (pariba di ex – Inter Bank). E edificio monumental aki lo acapara e departamento nobo di gobierno, esta e Aruba Fair Trade Authority (AFTA), cual su tarea principal lo ta pa percura pa competencia husto y proteccion di consumidor.
Minister Geoffrey Wever mediante un comunicado di prensa a indica cu e ta satisfecho cu e ubicacion nobo di e edificio. Durante un bishita na e sitio di construccion, el a constata cu e progreso ta conforme cu e plan y ta spera pa keda cla pa cuminsamento di december e aña aki.
“E renobacion ta un otro parti crucial di nos plan pa duna nos centro di ciudad mas bida y dinamismo,” Minister Wever a menciona. “Ta un paso importante den nos vision pa revitalisa e curason di Oranjestad.”
Wever ta gradici tur e trahadornan y organisacionnan involucra pa nan esfuerso y dedicacion y ta mira adelante pa e impacto positivo cu e proyecto lo tin riba e comunidad y economia local den centro di ciudad.
“E mudansa di AFTA pa centro di ciudad ta refleha e compromiso di gobierno pa fortalece e desaroyo urbano sostenibel y pa stimula crecemento economico den e area”, minister Wever ta termina bisando.
Anteriormente, a informa cu e proyecto aki ta wordo financia cu fondo Hulandes y cu fondo di Aruba. Tambe dia 6 di october ultimo, Wever a presenta e dos miembronan di Raad van Bestuur AFTA. Ta trata di Sr. F.R. Sint Jago cu a wordo nombra presidente di Raad van Bestuur di AFTA y Sr. T.M. Snoep cu a wordo nombra ‘gewoon lid’ di AFTA.
AFTA ta un entidad huridico independiente, basa riba ley. Su tarea principal ta pa crea nivel di competencia husto, liber y sin restriccion pa tur compania na Aruba, stimulando asina inversion di comercio den su generalidad.
Minister di Asuntonan economico ta responsable pa e sistema, politica di competencia y legislacion. AFTA ta responsable pa implementacion di e politica door di implementacion di reglanan nobo y revision hudicial.
AFTA ta e Autoridad di Competencia Husto. Competencia ta rivalidad entre empresanan pa obtene e mihor oferta pa e cliente. Den competencia husto, un empresa mester keda ahusta constantemente pa genera ganashi y mantene clientenan pa asina ta exitoso. No por desaprovecha ningun mercado potencial. Autoridadnan di competencia husto a demostra di tin beneficio, den practica, na mas di 125 pais. Un autoridad di competencia husto ta sigura pa no tin cartel, pa no tin abuso di posicion di poder, y ta haci obligatorio pa reporta concentracionnan.
