Oficina Central di Estadistica di Aruba (CBS) a cuminsa organisa e di seis edicion di Conteo General di Poblacion y Vivienda cu lo tuma luga na aña 2020, un Censo cu ta un instrumento valioso pa henter Aruba, instancianan publico, institutonan priva, scolnan y personanan individual por haci bon uzo di e informacion colecta pa formula maneho, haci planificacion y tambe pa keda al tanto di desaroyonan importante cu ta regarda e poblacion di Aruba.

Durante un entrevista cu Bon Dia a tene cu Damara Rasmijn, PR di comunicacion di Oficina Central di Estadistica di Aruba, el a splica cu e preparacion di e Conteo General di Poblacion y Vivienda (Censo 2020) a cuminsa e aña pasa cu diferente grupo di personanan cu ta encarga cu e preguntanan di e cuestionario.

Rasmijn a bisa cu na cuminsamento di aña aki nan a inicia un control riba tur e adresnan residencial cu tin Aruba, esey ta conta pa cas, apartamento, trailer, entre otro. Rasmijn a señala cu nan a cuminsa desde maart, pa nan por tin un idea di cuanto hogar ta existi na Aruba.

El a informa cu e ultimo aña cu nan a haci esey tabata na 2010, cu tabatin e cifra di 34.880 den total. E resultado di e aña aki ta di 25.024 adresnan residencial, cu nan a cuminsa controla desde e area di Lighthouse te Colony, pasando tur e cayanan.

Rasmijn tambe a comenta cu e control aki ta hopi importante pa motibo cu esaki ta e comienso cu nan mester conoce pa wak den cuanto grupo lo parti e isla, y cuanto adresnan e encuestadonan mester bishita pa inicia cu e Censo na october di 2020.

Desde dia 1 te 10 di october di aña 2020, tur hogar na Aruba lo wordo bishita pa un team di aproximadamente 1,200 persona of encuestadonan, cu lo ta encarga cu e tarea di colecta informacion riba topiconan manera vivienda, salud, educacion y labor.

Tambe el a bisa cu Oficina Central di Estadistica Aruba lo haci un piloto desde e 3 te 13 di october durante e temporada cu scolnan tin vakantie na unda nan ta bay purba e cuestionario y door cu nan ta bay riba caminda digital, con lo bay ta e proceso cu normalmente tabata riba papel.

Un reto cu Censo por tin ta e orario cu e encuestadonan lo bay bishita e casnan, pa motibo cu mayoria di hende ta bay trabou, y nan lo bay tuma esey na cuenta.

Un pregunta cu nan lo bay haci ta tocante obhetivonan di desaroyo sostenibel, ora un grupo haya algun dato cu tempo pasa Aruba no tabatin. Otro cu el a menciona cu ta algo nobo den e proceso aki ta preguntanan tocante tecnologia, por ehempel, uzo di internet of smartphone.

Di mesun manera Rasmijn a bisa cu e parti nobo di e di seis edicion di Censo ta e parti di digitalisacion. E personanan cu ta interesa pa fungi como encuestadonan lo por inscribi riba e website di  www.cbs.aw  y yena e formulario di inscripcion online, nan mester tin mas di 18 aña di edad, un educacion minimo di MAVO, conocemento pa traha riba un tablet y disponibilidad pa traha full e periodo di censo.

Un di e datonan importante di e Censo 2010 tabata e cantidad di persona cu ta biba na Aruba, un total di 101.484 persona, cu a nace na Aruba y cu ta stranhero, e nacionalidad cu e cifra mas halto tabata Hulandes, cu un cantidad di 83.327, di dos luga Colombia cu 6.646 y di tres Venezuela cu 2.452 persona cu ta biba na Aruba.

Pa finalisa, Rasmijn a duna di conoce cu e aña aki nan lo bay traha un campaña pa duna mas informacion di e diferente topiconan cu nan lo bay reparti cu e cuestionario, pa comunidad tin un idea di e motibo pa e cual nan ta haci e preguntanan, su importancia y pa nan por ta mas dispuesto pa coopera.