(AP) — Oficial top di seguridad Mexicano a bisa ayera cu dos administrador anterior a gasta $61 miyon pa cumpra spyware Pegasus, cu ta implica den vigilancia di gobierno riba oponente- y periodistanan rond mundo.
Secretario di Seguridad Publico, Rosa Icela Rodriguez a bisa cu a haya documentonan di 31 contract firma durante administracionnan di presidente Felipe Calderon na 2006-2012 y presidente Enrique Peña nieto na 2012-18. Algun contract por tabata disfrasa como compra di otro ekipo.
Gobierno a bisa cu cantidad di e contractnan cu e compania di spyware Israeli, NSO Group, tabata firma cu companianan fachada, cu hopi biaha ta ser usa na Mexico pa facilita ‘kickback’ of evadi impuesto.
Siman pasa, e investigador top anti-labamento di placa di gobierno a bisa cu oficialnan di e dos administracion anterior a gasta alrededor di $300 miyon di placa di gobierno pa cumpra spyware. Pero e cifra aki por refleha tur compra di spyware y vigilancia, of por inclui contractnan cu ainda no a identifica.
Santiago Nieto, cabesante di Unidad di Inteligencia Financiero di Mexico, a bisa cu e cobransa pa programanan manera e spyware Pegasus ta parce di a inclui pagonan excesivo cu por a haya nan caminda back pa oficialnan di gobierno como ‘kickback’.
Nieto a bisa cu e sumanan paga, y e forma con a paga esakinan, ta sugeri corupcion di gobierno den un programa di spionahe telefonico ya caba cuestionabel cu tabata enfoca riba periodista-, activista- y figuranan di oposicion, kende e tempo aya tabata inclui e actual presidente, Andres Manuel Lopez Obrador y su circulo cercano.
“Esaki ta implica of al menos ta presumi e existencia di actonan di corupcion, door di bende [e spyware] na prijs infla na gobierno entre e añanan di 2012 y 2018”, Nieto a bisa.
Lopez Obrador a asumi su cargo dia 1 di december 2018, y a priminti di nunca usa spyware. Nieto a bisa cu a detecta transaccionnan den e administracion actual.
Mexico tabatin e lista di mas grandi – alrededor di 700 number di telefon – entre e miles cu segun reportenan clientenan di NSO a selecta pa potencial vigilancia.
