Oficialnan di Salud Mericano un biaha mas a pidi hende pa stop di uza sigaria electronico te ora cu nan por haya sa pakico algun di nan ta contrayendo malesanan respiratorio grave.
Oficialnan a identifica 450 posibel caso, incluyendo cinco morto, den 33 estado. E conteo ta inclui morto recien reporta na California, Indiana y Minnesota.
No a logra vincula un aparato, likido of ingrediente specifico na e malesa, oficialnan a bisa. Hopi di esunnan cu a bira malo – pero no tur – ta hende cu a bisa cu a vape THC, e kimico cu ta duna marihuana su efecto psicoactivo. Hopi di nan ta adolescente.
Oficialnan di salud ta contando unicamente cierto malesa di pulmon den cual e persona a vape dentro di tres luna. Dokternan ta bisa cu e malesanan ta similar na herida di inhalacion, cu e curpa aparentemente reaccionando na un substancia cu e persona a aspira. Sintomanan a inclui perde rosea, fatiga, dolor di pecho y sacamento.
E malesanan tur a aparece e aña aki, y e cantidad ta aumentando lihe den e ultimo luna mientras mas estado a cuminsa investigacion. Un siman atras, oficialnan Mericano a calcula e cantidad na 215 posibel caso den 25 estado. No ta cla si e malesanan aki tabata tumando luga prome cu e aña aki.
Un oficial di salud na Illinois, Dr. Jennifer Layden, a bisa cu oficialnan no sa na ki momento e malesanan a cuminsa, pero cu a mira un aumento desde spring.
Anteriormente a reporta morto na Illinois y Oregon.
Oficialnan na Indiana a bisa cu e persona cu a fayece eynan tabata un adulto, pero no a bisa kico a pasa ni duna detaye. Oficialnan di salud na Los Angeles a bisa cu ta investigando un morto pa vaping tambe. Y na Minnesota, oficialnan a bisa cu e prome morto pa vaping confirma tabata un persona di mas di 65 aña di edad cu historia di problema di pulmon, kende a vape productonan ilicito di THC, y a fayece na augustus.
Atencion recien ta enfoca riba aparato, likido, pod di refill y cartucho cu no ta bendi na tienda.
New York a enfoca su investigacion riba un ingrediente yama Vitamin E acetate, uza pa haci juice di marihuana diki pero ta considera peligroso si keinta y inhala esaki. Investigadonan estatal a haya e substancia den 13 cartucho colecta for di ocho pashent. Den varios caso, e ingrediente tabata conta pa mas cu mita di e likido den e cartucho.
Tambe e New England Journal of Medicine a revela un serie di articulo cu ta duna detayenan medico tocante casonan reporta na Illinois, Wisconsin y Utah. Un articulo tocante 53 malesa na Illinois y Wisconsin a nota cu casi 1/5 di e casonan tabata hende cu a bisa cu a vape nicotina y no THC of CBD oil.
Pa e motibo aki, dokter y oficialnan di salud ta continua sugeri hende abstene di tur producto di vaping te ora e investigacion establece exactamente kico ta e raiz di e malesa.
