Den conmemoracion cu e 62 aña di introduccion di ley general di seguro di biehes (AOV) ayera mainta SVb a lansa su servicio nobo digital pa pensionadonan ‘MiPensioen’ den e caminda pa innovacion di sistema di seguridad social.

Edwin Jacobs director di SVb Aruba a ofrece algun palabranan na personanan presente como e personal di e departamento y tambe minister di Salud Dangui Oduber ken tambe a presencia e momento aki.

Seguro di AOV (Ouderdomsverzekering) a bin conociendo cambionan grandi a traves di tempo, den añanan 50 segun historia, e grandinan tabata conta cu caridad pa por sobrevivi y cu e ley di e seguro aki a introduci un derecho cu den tempo a bira un entrada importante pa e grandinan.

Jacobs a splica cu e caracteristicanan general di AOV ta cu e ta un seguro basa den solidaridad, ta depende exclusivamente den e residencia y tur asegurado cu entrada ta paga un prima di 14,5%.

Cada aña e edad di pensioen ta subi cu seis luna, na aña 2022 a bira 64 aña, pa 2023 ta bira 64.5 y te cu januari 2024 edad di pension ta bira 65 aña.

Di loke ta trata beneficionan cu e seguro ta ofrece, Jacobs a menciona cu pensioen pa personanan soltero ta na Afl 1.157 pa luna, pensioen pa pareha Afl 1.948 pa luna y pensioen pa pareha gesplitst Afl 974 pa luna.

Ademas, tur fin di aña aseguradonan ta haya 75% di pensioen pa luna y ora tin gastonan di entiero, e beneficiadonan ta haya maximo 3 luna di pensioen na unda el a remarca cu esaki mester wordo pidi den periodo di un luna.

Den casonan di personanan cu a divorcia of a bay biba afo, mester informa SVb pa asina ey no haya problema na momento di cobra pensioen.

E cantidad di pensionadonan den dies aña a aumenta na unda a compara cu na september di aña 2012 tabatin 16.729 pensionado registra y te augustus di 2022 e cifra a subi na 19.369.

E grupo di edad cu mas a haya crecemento den e cifranan aki ta esun di edadnan entre 75 y 89 aña, na september di 2012 tabatin 3.739 y te augustus di 2022 a registra 5.959 loke ta nifica un crecemento di 59.4%, esaki ta pa motibo cu edad di pensioen a cuminsa subi.

Di esaki, Jacobs a menciona no ta tur pensionado ta bibando na Aruba, e cantidad di pensionado na 2012 bibando na Aruba tabata 16.729 y 1.672 tabata biba afo, awor na 2022 e cantidad di pensionado bibando na Aruba ta di 19.939 y esun bibando afo -mayoria di nan na Hulanda- ta di 2.486.

Igualmente el a informa cu aña 2019 tabata uno hopi exitoso pa e fondo, pa motibo cu a genera mucho mas entrada na prima compara cu loke a paga den gastonan, despues pandemia di Covid-19 a yega Aruba unda e proyeccionnan tabata pesimista caminda Gobierno di Aruba a bin cu subsidio di salario cu a logra mantene e primanan y evita e caida grandi cu nan tabata premira. E recuperacion economico den dos aña aki a traduci den fondo unda na a ripara cu e aña aki e pronostico di posicion financiero di AOV di e aña aki ta mustra cu entradanan prima ta di 285.3 miyon florin, pensioen 265.6 miyon florin, resultado di surplus di 17 miyon florin y pronostico di posicion di likides ta na 69.5 miyon florin.

“Den proximo añanan esaki ta bay aumenta te cu aña 2024 y 2025 y resultado positivo ta bay keda reduci te keda negativo y pa final di añanan 2030 nos tin e reto cu nos tin cu wak con nos ta sigui haci’e pagabel”, Jacobs a bisa.

Di su parti, Luis Tromp hoofd pensioenen di e departamento aki a hiba e palabra unda a comenta cu na 2013 nan a pone un sistema automatisa y digitalisa unda nan a cuminsa elimina uso di papel di e departamento di pensioen.

E mesun aña ey nan a cuminsa registra tur e-mail adres di pensionadonan ora nan a haci peticion di pensioen of ora nan ta contacta e departamento pa un of otro motibo, na e momentonan aki segun Tromp a indica, tin 11.700 pensionado cu un e-mail adres registra den e sistema y door di esey e aña aki nan por a manda 11.204 jaaropgaaf via e-mail, 5.814 a bay via Post.

E website di pensioen a wordo lansa na 2016 cu e meta pa pensionadonan print nan documentonan, na 2017 Tromp a bisa cu nan a haci posibel pa aplica pa pensioen AOV via e website MiPensioen, awendia pensionadonan ta haya carta di invitacion na cas cu e peticion pa aplica via MiPensioen.

Aña pasa nan a haya 1.054 peticion di AOV di e cual 922 a wordo haci via MiPensioen y for di januari te cu augustus di e aña aki nan a haya 630 peticion, 609 a wordo haci via MiPensioen esey ta nifica cu 96% di tur peticion ta drenta di forma digitalisa.

Un servicio cu a haya bida durante pandemia segun Tromp a conta ta Whatsapp videocalls, cu esaki nan ta conecta cu pensionadonan cu no ta biba na Aruba pa asina nan por sa si e pensionado ta na bida y por sigui cobra su pensioen, e servicio aki ta mas sigur cu e documento ‘Attestatie de Vita’ y no tin un costo pa e pensionado. For di 2023 lo usa e sistema aki so y nan lo elimina e papel di ‘Attestatie de Vita’.

Ayera tabata e dia pa introduci oficialmente SVb su mobile app ‘MiPension’ cu personanan por download den e telefon mes y cu a ser traha pa ITP Caribbean, eynan e pensionadonan por haya nan jaaropgaaf y declaracion di entrada den nan man na tur momento, tambe por mira pagonan ricibi y por manda e-mail na e departamento di pensioen.

Aworaki, ya caba tin mas di 100 cliente cu ta usando e app aki manera Tromp a sigura y tambe a wordo actualisa pa pensionadonan por mira nan dianan di pago.

Pa finalisa, minister di Salud Dangui Oduber a duna algun palabranan na personanan presente caminda el a expresa cu nan ta hopi orguyoso di tur e trabou cu a bin haciendo for dia añanan caba den e proceso di digitalisacion, “nos a mira un cambio grandi con SVb ta funcionando hopi mas servicial, eficiente y hopi mas lihe cu ta cuadra cu e temponan cu nos ta bibando aden di innovacion y tecnologia”, el a bisa.