Ayera den oranan di mainta, prome minister Evelyn Wever-Croes conhuntamente cu minister di Turismo, Dangui Oduber y director di Aruba Ports Authority N.V (APA), Mark Figaroa a anuncia e apertura di proyecto Port City Aruba, cu segun nan a expresa, ta bay beneficia comunidad cu aproximadamente 3.000 cupo di trabao.

Prome minister a expresa cu gobierno ta hopi contento di anuncia e proyecto aki, e cual nan ta considera importante pa Aruba. “Un anuncio cu un impacto economico sumamente grandi pa nos pais y un impacto cu ta bay tin su efectonan positivo den henter nos comunidad.”

Na caminda pa un recuperacion economico unda Aruba a bin surpasando e retonan cu pandemia di Covid-19 a laga tras, por mira cu pa final di aña aki y comienso di 2023 Aruba su economia por yega na nivel di turismo prome cu pandemia y finanzas lo yega na un surplus atrobe, igualmente prome cu pandemia, segun e mandatario a sigura.

E yabi pa por logra esaki y mas ta e diversificacion di e pilar economico, unda cu e proyecto aki tin basta tempo den preparacion, for di aña 1995.

Di su parti, minister di Turismo, Dangui Oduber a expresa cu e proceso pa cuminsa cu un destaho publico ta bay cuminsa e aña aki y segun nan plannan e proyecto mes lo inicia den e di dos kwartaal di aña 2023.

“Ta un proyecto cu lo mester bira distinto na tur otro proyecto cu Aruba a conoce”, el a bisa.

E proyecto di Port City ta un area bunita cu hopi balor y atractivo pa un desaroyo cant’i di lama y ta p’esey cu – segun minister Oduber a sigura – pa hopi aña e gobierno aki y otronan pa dos decada caba a sinta pensa conhuntamente cu tur otro stakeholders na Aruba, despues di a consulta e mercado tambe pa wak unda e apetito ta pa mira e desaroyo cu Aruba tin mester di dje pa e tereno di Port City.

Segun minister Oduber, tabata na aña 2017 ora cu Gabinete Wever-Croes I a pone e proyecto aki como prioridad, pa motibo cu nan tabata sa kico ta e impacto economico, laboral y tambe pa finanzas publico.

Na aña 2018 nan a presenta e concepto di e proyecto na Conseho di Minister y nan a haya e aprobacion pa sigui desaroya e area aki.

Na momento cu Gabinete Wever-Croes II a cuminsa coalicion cu partido Raiz nan a haci un presentacion un biaha mas tumando na cuenta e partner nobo den coalicion y conhuntamente cu APA a haci henter un presentacion di e proyecto pa asina por haya aprobacion di e constelacion nobo di Conseho di Minister, pa por continua cu tur e trabao cu nan a cuminsa na aña 2017.

Den esaki, nan a institui un ekipo di proyecto unda tur e terenonan cu tabata di pais Aruba mester a wordo traspasa pa Aruba Ports Authority N.V, mester a prepara e tereno, e business plan pa asina por midi e impacto economico financiero pa APA, den cual nan a prepara un diseño di kico e proyecto lo mester bira.

Despues di esaki nan a tene market consultations pa asina por explora e mercado y wak si e futuro di e desaroyo lo cuadra cu e proyecto den area aki. Finalmente nan a percura pa lanta un compania di real estate nobo cu ta resorta bao di APA pa maneha e proyecto aki.

Aworaki nan ta den ultimo fase, unda nan a cuminsa prepara tur e documentonan pa e destaho publico cu ta bay tuma luga ainda e aña aki.

Nan a tuma na cuenta kico ta importante den e prome fase cu ta bay ta for di Bushiri te e rotonde di Wendy’s na L.G Smith Boulevard, conhuntamente cu APA nan ta considera cu e proyecto aki lo mester bira un ‘MIX’, caminda mayoria di area cu tin pa desaroya lo wordo destina pa areanan publico y pa comunidad por haci uso di nan.

Pa e motibo aki nan a pensa riba 7 elemento: e prome ta cu Port City lo mester fungi como un gateway, como e prome impresion ora turistanan ta yega na e waf, tambe mester fungi como un parke caminda turistanan y localnan ta topa cu otro, ta un oportunidad unico pa desaroya henter e area aki, ta bay conta cu un boardwalk den futuro cu ta bay conecta e terminal di crucero te cu Bushiri Beach, e experiencia di awa y parke mester ta central den diseño tumando na cuenta e parti sostenibel y economia circular.

Di 187.000 metro cuadra cu e area aki tin pa desaroya, solamente den 43% lo wordo desaroya Boutique Hotel, Condo, viviendanan, retails y food and beverages, e resto lo wordo destina pa areanan publico cu lo tin hopi vegetacion.

Henter e proyecto aki lo tin un duracion di entre 15 pa 20 aña y aworaki nan ta bay cuminsa cu e prome fase unda cu 40% di e proyecto lo mester wordo paga pa e desaroyador di e proyecto cu lo gana e destaho y entradanan cu lo wordo genera lo wordo inverti pa APA den e area.

E proyecto ta bira un inversion di casi un biyon florin di sector priva y cu entradanan cu lo wordo genera lo wordo inverti back den mantencion, ora e proyecto lo ta operacional lo tin un contribucion economico di aproximadamente 4.5% pa economia di Aruba y pa aña e lo genera 40 miyon florin pa gobierno.

E business plan ora e proyecto lo ta cla lo tin un 3.000 cupo di trabou segun minister Oduber a declara.

Mark Figaroa director di APA a comenta cu nan ta den un proceso di modernisacion cambiando structura di un compania operacional pa un compania comercial y aworaki nan ta depende principalmente di entrada di turistanan di crucero y tambe e parti di carga, “esey ta e unico dos entrada primordial cu APA ta depende di dje y a base di esaki nos a busca formanan pa cuminsa diversifica y crea otro formanan di entrada pa APA, mi ta kere cu Port City ta un di e proyecto cu ta bay yuda nos logra nos meta”, el a bisa.