Dies persona, incluyendo cinco fugitivo Ruso, a wordo acusa en conexion cu atakenan cu software malicioso cu a infecta decenas di miles di computer mundialmente, y a busca di horta $100 miyon for di e victimanan, segun autoridadnan Europeo y Mericano a anuncia diahuebs.
E malware a permiti criminalnan di oost Europa pa tuma control remoto di computernan infecta y horta fondo di e cuentanan bancario di e victimanan, como tambe compania y institucionnan den tur sector di bida Mericano. Victimanan a inclui un compania legal na Washington, un iglesia na Texas, negoshi di mueble na California, un casino na Mississippi, y un negoshi di asfalt na Pennsylvania.
Varios acusado ta wardando proceso na Europa, y cinco ta Rusonan cu ta keda fugitivo den e pais. Un di 11 participante den e conspiracion a wordo extradita na Merca for di Bulgaria na 2016, y a declara su mes culpabel luna pasa den un caso relaciona na corte federal na Pittsburgh, unda e cargonan a ser treci diahuebs.
Maske departamento di Husticia a busca varios enhuiciamento pa malware den añanan recien contra hackernan stranhero, e caso aki ta resalta como un model nobo di colaboracion internacional, segun Scott Brady, fiscal na Pittsburgh.
Na luga di pidi extradicion inmediato pa tur 10 acusado – un proceso usualmente dificil cu por dura añanan di negociacion – autoridadnan Mericano a comparti evidencia cu nan contrapartenan Europeo pa permiti oficialnan na Ukrania, Moldova y Georgia cuminsa enhuiciamento den e paisnan unda e acusadonan ta biba.
“E ta representa un cambio di paradigma den enhuiciamento di crimen cibernetico”, Brady a bisa prome cu un conferencia di prensa na Den Haag cu un coalicion di mey dozijn di pais.
Crimen cibernetico no tin frontera, y criminalnan a tuma bentaha di e complehidad legal di purba di bringa contra dje, segun Steven Wilson, presidente di e centro Europeo contra crimen cibernetico na Europol. “Unicamente mediante cooperacion internacional nos tin speransa di lucha contra dje”, el a bisa, añadiendo cu e cargonan ‘lo provee un internet mas sigur pa nos tur’.
E cargonan ta inclui conspiracion pa comete fraude di computer, conspiracion pa comete fraude di banco, y conspiracion pa labamento di placa.
E investigacion tabata continuacion di un desmantelacion di departamento di Husticia na 2016, di un red di server di computer conoci como Avalanche, cu tabata sede di mas di 20 diferente sorto di malware. GozNym, e malware cita den e caso diahuebs, tabata entre esunnan riba e red.
Oficialnan a bisa cu el a wordo forma pa e acusadonan mientras nan tabata ofrece nan habilidad tecnico den forum criminal online Ruso. E acusadonan tabatin diferente participacion den e conspiracion: desaroyo di e malware, encripcion, distribucion, y acceso na cuentanan bancario di e victimanan.
E lider di e red, segun autoridadnan, tabata di Tbilisi, Georgia, y a huur acceso na e malware for di un desaroyado, kende a traha cu coders pa crea GozNym.
