Hefe di desarmamento di Nacionnan Uni a adverti cu crimen cibernetico ta den aumento, cu un aumento di 600% di e-mail malicioso durante pandemia di COVID-19.
Izumi Nakamitsu a bisa durante un reunion informal di Conseho di Seguridad di Nacionnan Uni cu e crisis di coronavirus ta moviendo mundo den direccion di aumento di innovacion tecnologico y colaboracion online. Pero el a bisa cu ‘tambe tin reportenan preocupante di atake (cibernetico) contra organisacionnan di salud y facilidadnan di investigacion medico rond mundo’.
E alto representante pa asuntonan di desarmamento a bisa cu dependencia digital aumentando a aumenta vulnerabilidad pa atake cibernetico y ta calcula cu un di e atakenan aki ta tuma luga cada 39 seconde. El a bisa cu segun Union Internacional di Comunicacion, casi 90 pais ainda ta apenas den etapa inicial di haci compromiso pa siguridad cibernetico. Nakamitsu a bisa cu e menasa di mal uso di informacion y tecnologia di comunicacion ‘ta urgente’.
Pero tambe a bisa cu tin bon noticia, notando progreso global na Nacionnan Uni pa aborda e menasa di un grupo di expertonan di gobierno cu a desaroya 11 norma boluntario no obligatorio di comportamento estatal responsabel den uso di dicho tecnologia.
Mision Ruso na Nacionnan Uni no tabata presente, pero a post un discurso cu lo a entrega, cual ta bisa cu ‘mundo literalmente ta haya su mes awo dilanti di un eleccion entre paz cibernetico global of guera cibernetico’. Rusia a bisa cu e pandemia di COVID-19 a introduci cambionan dramatico na bida di hende y a mustra cu e dependencia mundial riba informacion y tecnologia di telecomunicacion ‘awo ta sin precedente’.
Moscu a acusa un ‘minoria elite’, cual su miembronan e no a identifica, di busca activamente e ‘militarisacion di espacio cibernetico door di pusha dilanti e concepto di ‘atake cibernetico militar preventivo’, incluyendo contra infrastructura critico’.
