Off Road Wheelchair Aruba cu evento pa recauda fondo

Awe lo tuma luga un evento di recauda fondo pa Off Road Wheelchair Aruba. Cu e evento aki segun Sra. Claudia Janssen, kende ta coordinador di e fundacion, kier yega un stap mas cerca di nan meta. E fundacion tin diferente meta, pero un di nan ta pa yega na un solar panel.

E evento lo tuma luga na Cafe 080 y e ta cuminsa pa 8’or di anochi. “E tema lo ta ‘Ladies night.’ E damanan tin e oportunidad pa cumpra y contribui na esaki. Hendenan homber tambe por ta presente pa admira e evento aki, el a bisa Bon Dia Aruba. E grupo di Kiwanis y CEDE Aruba tambe ta interesa pa yuda Off Road Wheelchair Aruba, unda cu nan kier haci un donacion pa asina e rolstoel aki por wordo uza pa esunnan cu cierto limitacion fisico.

E evento di recauda fondo ta specialmente pa yega na cumpra solar planel pa asina por pone esaki riba e rolstoel cu ta di electricidad. Tambe e persona cu ta haci uzo di e rolstoel aki por sinta bou sombra. Aworaki tin 1 rolstoel pa core riba santo blanco, pero nan kier yega na 6, segun Sra. Janssen. “Mi ta invita tur hende pa bin na e evento aki pa asina nos por logra e meta pa cumpra panel solar pa pone riba e rolstoel.”