Secretario general di Organisacion di Estado Americano (OEA), Luis Almagro, a bisa cu oposicion Venezolano no tin ningun rason pa participa den un eleccion municipal sin garantia di transparencia. E proceso di eleccion lo por tuma luga na luna di december.
“No tin ningun logica pa participa den un proceso cu no tin garantia, pasobra gobierno no por hunga cu e voto di hende”, Almagro a splica durante un asamblea di sociedad interamericano di prensa na Salt Lake City.
Secretario general di OEA a bisa cu proceso electoral na Venezuela ta falso y cu gobierno ta hari di resultadonan di eleccion tambe.
Almagro a bisa cu dia 16 di october, grupo di oposicion Venezolano no lo a acepta e resultado di eleccion regional na Venezuela, den cual Chavismo a haya 18 di 23 gobernacion, mientras cu oposicion a haya cinco solamente.
“Ningun eleccion na Venezuela lo duna garantia pa tur electornan sin observacion internacional certifica y specialmente di banda di nos organisacion aki”, el a bisa.
Oposicion a papia tocante iregularidad den eleccion, caminda gobierno a cambia centro di votacion na ultimo minuut y otro iregularidad como usurpación di identidad, pa asina logra cu algun persona por vota mas di un biaha. Sin embargo poder electoral y gobierno lo sigura cu tabata un proceso di eleccion cla. Asamblea Constituyente a ordena na poder electoral na Venezuela pa cuminsa cu e preparacion di un proceso di eleccion municipal na luna di december.
