Organisacion di Estadonan Americano (OEA) a revela diaranzon cu segun cifra oficial alrededor di 110.000 Venezolano a bolbe pa nan pais via Colombia y Brasil, debi na e pandemia di Covid-19.
“Te cu e fecha aki a registra aproximadamente 105.000 retorno di Colombia y 6.000 di Brasil, segun cifra oficial”, e informe ta señala. E documento ta repasa e crisis migratorio Venezolano, cu mas di 5,1 miyon persona cu a bandona e pais desde 2015, y con e pandemia di Covid-19 a aumenta e dificultadnan den e lugarnan di acogida, a raiz di e medidanan di limitacion di movimiento pa evita propagacion di e virus.
“Informalidad economico ta un di e principal caracteristicanan di e poblacion di migrante y refugiado den region, teniendo un proporcion superior di esnan cu ta participa y ta biba den economia informal compara cu esnan cu ta forma parti di economia formal,” e estudio ta indica.
OEA ta detaya cu, como resultado di informalidad economico, e fuentenan di entrada di e personanan aki “a keda substancialmente afecta, causando cu miles di famia di migrante refugiado Venezolano a keda sin vivienda, sin lugar di biba durante lockdown”. Ademas di esaki hopi di nan por lo general “no tin acceso na sistemanan di salud debi na nan situacion di iregularidad”.
Esaki a hiba hopi Venezolano na e decision di bolbe pa nan pais, den cual nan a haya asistencia di e paisnan den region. Na Colombia, segun e documento, desde maart tin un coredor humano pa permiti e retorno di e Venezolanonan, unda a pasa 27.000 persona den e luna ey so.
Di otro banda OEA a adverti cu “e ciere intermitente y arbitrario” di frontera di parti di gobierno di Nicolas Maduro “a agrava e situacion di e personanan cu ta trata di bolbe nan pais, hibando na sistematisacion di violacion di nan derechonan”.
