Odillia ta un artista multifacetico cu ta sobresali den bailamento, canto y rap. Recientemente, tambe el a sobresali pa su amor pa Aruba. Den un entrevista exclusivo cu Bon Dia Aruba, Odillia a conta nos tocante su plannan pa futuro y su relacion cu nos isla.

Odillia a conta cu tabata un proceso largo den cual el a desaroya su mes como artista. “Mi mama a pone mi den les di ballet tempo cu mi tabatin 6 aña – esey no tabata realmente algo pa mi.” E tabatin ADHD, pues tabata un mucha hopi activo, pa loke e coach di hip hop a sugeri pa e cuminsa cu un baile cu ritmo mas lihe. El a join un grupo di baile hip hop, y cu e grupo el a gana varios competencia, incluyendo campeon mundial na 2008. “Mi semper tabata sa cu mi kier ta riba escenario.”

Pero tempo cu e tabata den scol secundario, ‘mi a pasa den cosnan dificil cu mi no por a conta niun hende’. “E tempo ey mi a cuminsa skirbi – storia, rima, y mi a cuminsa scucha Lil’ Kim. Mi a cuminsa rap su letranan, y asina mi a namora di hip hop”, Odillia a conta. Maske e ta Hulandes, el a nota cu e no tin un acento Hulandes sino cu e tin un afinidad cu idioma Ingles. El a cuminsa como rapper y cantante. “Mi semper tabata sa mi kier yega Merca.”

Pa sigui cu su carera el a bay scol musical, cu 16 aña di edad. Aña pasa el a gradua, y mesora a reserva un ticket pa bay Los Angeles cu un espiritu aventurero y speransa di busca un label musical. “Mi tabata determina cu mi ta bay logra. Mi a pasa tres siman cu mi a sinta literalmente dilanti porta di labelnan musical ta papia cu hende, busca e hende corecto. Pero esey no a duna resultado.” Anochi, el a bay hotelnan na Beverly Hills unda e sa cu ehecutivonan di industria di musica tabata. Asina el a conoce su manager actual, Mike Luke di Lukevision Records, kende a compaña Odillia durante nos entrevista.

“Un amigo en comun a introduci nos na otro”, Luke ta comenta. “Ami ta e sorto di persona cu mi ta scucha cualkier cos pasobra bo nunca sa. Pero ora e ta bin di un amigo, definitivamente mi ta scucha.” Pa nan prome encuentro, Odillia a trece un EP cu e mes a prepara pa Luke. Ora Luke a mira esaki, ‘mi a pensa, si, e ta cla’. “E djis mester ayudo, e djis mester direccion y guia. Y mi a bisa, ‘si ami no contrat’e, otro hende lo hacie, y mi lo arependi.”

Mirando su video musical di mas recien, Break It Down cu participacion di Snoop Dogg, en berdad por nota e nivel di madurez y preparacion cu Odillia, a pesar di su edad jong, a alcansa caba. “Hende ta puntra mi kico mi lo a haci si Luke no a contrata mi”, Odillia ta comenta. “Mi lo a djis haya un productor diferente”, el a bisa cu un sonrisa.

“Mi ta skirbi tur mi musica”, el a comenta. Letranan, rap, tur cos. “Mi ta hopi orguyoso.”

Odillia a filma su video musical pa Break It Down na Aruba na juli, y luna pasa e tabata back riba nos isla cu un campaña di recaudacion di fondo. “Aruba ta asina bunita, boso beachnan ta e miho, tur cos ta asina bunita. Nos a mira varios isla pero Aruba tabata esun di mas bunita. Ademas, mirando e situacion di covid, Aruba tabata permiti entrada pa persona di Merca, y esey tabata hopi importante, pues nos a scoge Aruba. Mi a namora di e isla.”

El a sinti tambe un necesidad pa duna back despues di a ricibi hopi cariño durante su prome estadia. “Loke mi ta stima di Aruba ta su hende, boso ta asina feliz y amabel, esey tabata refrescante pa mi. Mi ta djis stima e isla. Boso ta bisa ‘One Happy Island’ y en berdad esey tabata mi experiencia.”

Durante su segundo biahe el a bishita diferente luga, sinembargo, beach a keda su faborito. “Nos a haci un tour cu A.T.A., nos a bay Faro, Gold Mine, Ayo Rock Formation. E Gold Mine mi a haya impresionante, e ta un luga hopi mistico. Pero mi faborito ta Boca Catalina. Mi ta djis stim’e, e ta mi luga faborito.”

Y cuminda local? Maske el a purba hopi cos… “Sate cu batata! Esey ta mi faborito, maske realmente mi a namora di e cuminda local.” Pa su evento pa recaudacion di fondo, el a bishita varios fundacion local, manera Trampolin pa Trabao, Sonrisa, FAVI, Muchila Creativo, y Popcorn Dancers. “E muchanan a yena mi curason”, el a comenta.

Odilia a conta nos cu e caminda pa yega unda e ta awo no tabata uno facil. “Mi no ta bin di un famia unda hende a kere den mi en absoluto. Pues pa mi, esey a tene mi candela interior cendi, pasobra mi a experiencia asina hopi rechaso. Pa mi, ta djis bay pa kere den bo mes y no laga niun hende bisa bo cu bo no por hacie. Mi ta kere esey ta un clave, sigui traha riba bo vision. Hende rond di bo no ta wak loke bo ta wak. Esaki ta mi vision. No tin plan B, si bo kier esaki, djis pay p’e!” Na Los Angeles no tabata facil pa keda experiencia rechaso di e ehecutivonan di industria musical. “Tin biaha nan no ni tabata papia cu mi, djis ignora mi y subi den auto”, el a conta. “Tabatin definitivamente momentonan dificil, yoramento. Tabatin dia cu mi a djis keda den mi Airbnb y pensa kico mi ta bay haci. Pero e ta bay pa e dia siguiente lanta y bay di nobo, bolbe purba.”

Tocante con nos cultura por yega na tin un influencia riba su musica, Odillia a bisa Bon Dia Aruba cu musico local, Ataniro, kende recientemente tambe a participa cu Odillia den e accion di recaudacion di fondo pa fundacionnan local luna pasa, ta un persona cu ken e lo kier colabora. “Mi lo gusta pa colabora cu musiconan local, definitivamente. Mi gusta ritmonan Caribense.”

Ademas, luna aki di december Odillia lo tin un concierto virtual transmiti globalmente for di Aruba. “December nos ta bin back e isla pa un concierto virtual”, Odillia ta bisa.
“Nos ta preparando tur cos caba. Ora nos bin back nos lo presenta ‘Odillia en bibo for di Aruba’”, Luke ta agrega. “Lo tin musica di Pasco, e canticanan conoci y musica nobo di Odillia. Nos djis kier pa hende sinti bon. Ta temporada di Pasco, si nos por pone un sonrisa riba cara di hende, si nos por pone bo sinti bon y cu bo ta bay logra pa e siguiente dia, esey nos kier haci. Inspira.”
“Aruba a mustra mi asina hopi amor”, Odillia ta continua. “Mi no ta custuma na esey. Mi a namora di e isla y mi djis kier bin e mayor cantidad di biaha cu ta posibel.”

Potret: Bon Dia Aruba y Instagram @Odilliahh