E gigante di construccion Brasileño Odebrecht a nenga ayera cu nan lo a entrega placa durante binti aña na FARC, pa garantisa e seguridad di su obranan na Colombia, manera e semanario Veja a afirma diasabra ultimo na Brasil.
“Odebrecht ta desmenti y ta confirma cu e afirmacion di e reportahe di Veja, segun cual e empresa lo a realisa pago na un grupo guerrillero Colombiano, ta un speculacion”, e firma ta indica den un comunicado transmiti na AFP. Segun e publicacion Brasileño, dos ehecutivo di e compania a admiti dilanti di fiscal general di Republica cu e pagonan ey, di entre 50.000 y 100.000 dollar pa luna, a ser efectua a cambio di “permiso” pa realisacion di obra den e zonanan controla pa e guerrilla.
Denomina “impuesto guerrillero” pa FARC, e pagonan ey tabata cualifica como “costo operativo” o “tributo teritorial” den e balansnan administrativo di e empresa. E acuerdo aki a permiti Odebrecht realisa entre otro trabaonan na e ‘Ruta del Sol’, un autopista di mas di 500 km, cu ta uni centro di Colombia cu e costa di Caribe. Odebrecht ta un di e principal empresanan obheto di e investigacionnan di e operacion “Lava Jato”, cu a revela un sistema di corupcion instala pa e gruponan Brasileño di ingenieria civil pa obtene, a cambio di soborno, contracto di e compania petrolera estatal Petrobras. Decenas di responsabel di empresa y lider politico di tur partido ta tras di tralie den e caso aki.
E sistema a keda reproduci pa Odebrecht den decenas di pais di America Latino, incluyendo Colombia. FARC a firma na november un acuerdo di paz cu gobierno pa pone fin na un conflicto cu a laga por lo menos 260.000 morto, mas di 60.000 desapareci y 6,9 miyon di persona desplasa.
