E grupo empresarial Brasilero Odebrecht cu ta den scandal di corupcion di Petrobras, a duna supuestamente placa ilegal pa campaña di lider opositor Venezolano Henrique Capriles na 2012, e corant Valor a publica na Brasil. “Euzenando Azevedo, ex-director di Odebrecht na Caracas a bisa cu el a transferi placa pa Capriles, pafo di nan sistema contabel. E no a bisa e cantidad di placa cu a dun’e. Azevedo a splica cu nan a dicidi yuda Capriles, como un manera pa no pone tur webo di e empresa den un macuto solamente,” corant Valor a informa.
Segun corant Valor “ex-presidente Hugo Chavez tabata e mayor destinatario di placa ilegal cu empresa Odebrecht tabata duna na Venezuela, pero ora cu servicio di inteligencia militar a detecta e contribucion pa Capriles, anto e gobierno di Chavez a menasa Odebrecht cu posibilidad di cancela tur contrato di e empresa aki.
Na e momento ey Marcelo Odebrecht a pidi dispensa na gobierno di Chavez, specialmente dilanti di Nicolas Maduro cu tabata e canciyer na e momento ey, y Azevedo a bandona su posicion na Caracas.
Odebrecht, ta un pulpo di ingenieria y construccion y awor ta colabora cu husticia di Brasil, pa asina haya un disminucion riba condena di nan ehecutivonan. Odebrecht a compromete su mes pa paga 2.600 miyon dollar tambe.
