Awe ta tuma luga e competencia di baile escolar den conexion cu Weganan Escolar 2024. Durante un entrevista cu John Freddy Montoya di Departamento di Cultura Aruba y un di e motornan tras di e evento aki, e ta conta con e preparacionnan ta bayendo y kico publico por spera durante e competencia aki.
Ayera tardi na Entertainment Center tabata tumando luga e ultimo preparacionnan y e training general pa tur e scolnan cu lo ta participando. Montoya a splica cu pa training general tabatin un secuencia y mirando esaki, el a indica cu tur scol ta preparando hopi bon pa e competencia.
“Mi ta sinti cu tur scol ta bon prepara y entusiasma pa asina ki por comparti cu Aruba tur loke ta e talento di nos muchanan. Y tambe ta oportunidad di profila esaki den diferente estilo, estilonan moderno, sin lubida nos folklore cu ta un parti tambe hopi primordial pa bin na remarca,” el a indica.
E aña aki tin un total di ocho scol preparatorio, special, basico y secundario cu ta participando den seis diferente categoria. Compara cu e aña anterior, Montoya a remarca, cu e interes y participacion ta mesun cos.
“Cada aña tin su specialidad, cada aña e ta algo special. E aña ki tin mesun interes, mesun participacion y tambe e modalidad di maestronan cu tambe ta comparti cu Aruba completo tur e chispa, tur e creatividad y energia cu cada maestro tin. E ora ey tin un toke special,” el a resalta.
Cada scol ta haci nan presentacion na nan gusto, pero un di e reglanan importante ta cu e presentacion mester contene e aspecto di baile cultural, baile folklorico di Aruba.
Montoya a enfatisa cu e meta di e competencia escolar no ta solamente pa cuminsa inculca amor pa cultura for di un edad trempan, pero cu e competencia aki nan mustra cu baile tambe ta forma parti di deporte.
“E ta un manera sano cu bo ta desaroya bo mes fisicamente y baile riba su mes tin rond mundo competencianan deportivo na unda baile acrobatico ta tuma luga y esaki ta un bunita oportunidad pa mustra cu baile ta desaroya e muchanan fisicamente, e ta spierta nan creatividad, e parti di desaroyo motorico y e ta hopi importante pa cuminsa di mucha y naturalmente inculca e amor pa baile y movecion na scol,” el a subraya.
