Recientemente den luna di april, Adopt An Addict a bolbe hiba 8 persona masculino bay rehab na Republica Dominicano.
Inicialmente mester a biaha 9 persona, pero un a huy e anochi prome, segun e comunicado di Adopt An Addict. Segun nan ‘ta haci falta di un luga pa tene nan un par di dia pa gananan sober y terapianan, pa asina nan por sigui un tratamento mas avansa’. Tambe nan ta bisa cu ‘lamentablemente hende muhe -cu nos tin varios pa yuda- nan no tin nada pa por traha cu nan y motiva nan pa cambia nan bida’. E problema social ta grandi y ‘mester yuda alivia e situacion’.
Adopt An Addict ta un fundacion cu ta existi ya 10 aña caba. E ta un ‘half way house’, cu e nomber Cas Speransa, unda e clientenan ta haya tratamento pa nan adiccion te ora nan ta asina yama ‘clean’. Nan ta sigui biba bou guia y sigui traha pa keda liber di adiccion. Esaki ta te ora nan por biba independientemente.
Prome cu e clientenan ta asina leu, mayoria ta haya oportunidad -cu ayudo financiero di gobierno- pa sigui haya tratamento den un centro di rehabilitacion na Santo Domingo. Ora nan bin bek Aruba, nan ta haya alohamento den Cas Speransa na Moko.
