E caso di e conflicto encuanto e hotel na Malmok, conoci como Ocean Z Boutique hotel ta parce di trece mas asunto na luz di dia cu gobierno lo ta desea. Den e editorial aki luna pasa nos a expresa caba nos asombro pa e posicion cu abogado di gobierno a tuma den e caso. El a tuma un posicion intermedio prome, treciendo dilanti cu e ministro di Infrastructura, a alerta e desaroyado cu e no tin un permiso pa opera un hotel segun e condicionnan di e erfpacht cu tabata pa un vivienda. Pero seguidamente na nomber di e ministro y gobierno el a opone e stop di e operacion di e hotel. Como unico medio di comunicacion den e editorial aki a cuestiona e forma di procede di gobierno via su abogado, cu a scoge banda di e desaroyado, y nos a anticipa cu tin algo straño ta hunga un papel den esaki. Finalmente hues a dicta na fabor di e habitantenan y a pone e decision den e caso pa dia 13 di januari 2016.
Kico ta resulta awor, si nos informacion ta corecto? Cu ministro encarga cu Infrastructura dia 5 di januari ultimo a otorga e permiso pa cambio di e destinacion, permitiendo asina operacion di un hotel. Asina el a habri porta pa e desaroyado pa pone otro parti di gobernacion bao presion pa otorga e permiso di hotel mes, bao di e ‘Vergunningsverordening’, cual ta responsabilidad di ministro encarga cu Salubridad Publico. Kico ta e situacion awor anto?
Den caso cu e ministro encarga cu Salubridad Publico nenga e permiso, e desaroyado ta den un posicion mucho mas comodo pa hiba e asunto corte, y gana su caso. Esaki gracia na e ayudo di e ministro di Infrastructura, cu lo mester duna cuenta ta pakico el a actua asina. Saliendo semper for di punto di bista cu e ministro no tin otro interes (financiero o di otro indole) pa considera, e pregunta na su persona mester ta pakico el a tuma e decision aki, y tambe pakico el a tuma e decision aki prome cu decision di hues den e caso. Nada lo a costa su persona (esey nos ta supone) pa warda e decision den e caso pa despues evalua e situacion y yega na un decision cu lo a cuadra cu bienestar general.
Awor ta bin resulta cu nos sospecho cu gobierno (ministro Sevinger) a haci compromiso caba pa cambia e condicion di erfpacht a resulta corecto. E ministro a djis manda un carta na december pa disimula ya cu aparentemente e tabatin pensa di otorga e permiso. Pregunta interesante ta keda tambe ken ta e ministro(nan) cu a instrui e huristanan cu a atende e caso, pa loke tabata e punto di bista di gobierno den e caso aki. Tabata esun di Infrastructura, of esun cu ta dirigi departamento di Legislacion, esun encarga cu Husticia, of tur dos? Ministronan encarga cu Salubridad Publico y di Turismo tabata envolvi den un consulta sano entre colega, kico lo mester tabata e posicion di gobierno?
En todo caso awor henter Aruba por presencia un actuacion repudiabel di un ministro cu aparentemente kier mustra tur hende, inclusive su colega y contrincante Otmar Oduber, cu ‘esun cu por, por’ y a pone un paso cu ta haci dificil pa gobierno opone operacion di e hotel a base di e otro permiso (di hotel mes) cu mester sali ainda, si esey tabata un opcion pa considera.
Hunto cu e asunto di e all-inclusive hotel na Bubali, unda aparentemente e ministro encarga cu Infrastructura tambe ta dal bay y haci riba su mes loke e ta considera oportuno, henter e asunto aki ta pone mas claridad riba e critica treci dilanti pa e ministro encarga cu Turismo, cu ta sinti cu di e manera aki e no por keda carga responsabilidad pa actuacion gubernamental. Y kico ta tende di e responsabel maximo di e gabinete aki? Exactamente: nada. Ora mas ta haci falta di un lider cu ta exigi di su ministronan un comportacion corecto, e ‘fiera’ cu a enfrenta gobierno di Reino cu hasta un welga di hamber, aparentemente awor no tin e curashi pa atende e asunto, of talbes no sa con pa atende esaki. Naturalmente su posicion no ta nada envidiabel, ya cu e mester a scoge entre dos ‘kroonprins’, di cual un ta di e teritorio original di Playa Pabao y cu dificilmente e por laga cay. Cu e conflicto cu a surgi cu ministro Oduber den seno di conseho di ministro siman pasa, ta parce cu lider di partido AVP a scoge caba pa esun mas yega na su persona. Esey ta un indicacion tambe cu e conflicto ta iremediabel y cu prome cu 1 di maart yega, ya lo tin un claridad den e asunto aki. Cu mas detaye cu ta bay drentando tambe encuanto e relacion entre gobierno di Aruba (tambe ministro Sevinger) y e inversionista cera na Merca, Roberto Rincn, nos tin un temporada cayente nos dilanti.
